Ўзбекистоннинг энг яхши мураббийи: "Тўғри, ҳар хил клублардан қизиқишлар бор, лекин ҳозир бандман"

Ўзбекистон олимпия терма жамоаси ва “Олимпик” клуби бош мураббийи Тимур Кападзе жорий мавсум якунларига кўра, Ўзбекистоннинг энг яхши мураббийи деб топилганидан хабарингиз бор.

Кападзе бошчилигидаги терма жамоамиз Осиё чемпионатида финалга қадар етиб борди. “Олимпик” клуби Суперлигадаги дебют иштирокидаёқ 6-ўринни қўлга киритди.

Тимур Кападзе асосан олимпия терма жамоасига номзод футбоочилар билан клубда ҳам бирга ишлади, тажрибасини оширди. Суперлигада йўқолиб қолишгани йўқ. Бунда Кападзенинг мураббийлик салоҳияти ҳам катта роль ўйнади.

Sports.uz журналисти Кападзенинг бир қатор масалалардаги фикрлари билан қизиқиб кўрди.

- Тимур ака йилнинг энг яхши мураббийи бўлганингиз билан табриклайман. Шу совринни ютишингизни кутганмидингиз?

- Табрик учун раҳмат. Биринчи навбатда бизни бу совринга муносиб кўришгани учун ҳаммага ташаккур билдираман. Ушбу совринни бутун жамоамизники деб биламан. Чунки биз биргаликда ютуқларга ва ўсишга эришдик. Ишонаманки, мазкур мукофот жамоамизни янада кучли қилади. Мен учун энг муҳими олдимизга қўйилган мақсадга эришиш!

- Умуман олганда, 2022 йилги мавсум сиз учун қониқарли кечдими ёки...

- Албатта, қониқдим. Чунки бу мавсумда катта тажрибага эга бўлдик ва яхшигина ўсдик.

- “Олимпик” клуби Суперлигада ўз ўрнига эга бўлди. Келаси йил учун вазифа қандай? Бундан ҳам кучли “Олимпик”ни кўрамизми?

- Ҳар доим вазифа жиддий ва юқори бўлади. Бунга албатта эришиш учун интиламиз. Ўйиндан-ўйинга, йилдан-йилга кучли бўлиб борамиз. Негаки, ҳар бир учрашувдан ўзимиз учун керакли тажрибаларни оляпмиз.

- Таркибда қандай ўзгариш бўлади ёки ҳамма ўйинчи сақланиб қолинадими? Кимларни таклиф қилмоқчисиз?

- Таркибга келсак, буни вақт кўрсатади. Чунки ижарадаги футболчилар ҳам бор. Улар клубларига қайтади. Аммо деярли катта ўзгаришлар бўлмайди. Биз тайёргарлик кўришимиз керак.

- Шогирдларингиздан қайсиларига четдан яхши таклифлар тушяпти?

- Жамоамизга ҳали ҳеч қанақа таклиф келгани йўқ. Аммо футболчиларимизга кўп жамоалардан қизиқишлар бор.

- Хизматингизга четдан жиддий қизиқиш бўлаётгани ростми? Сир бўлмаса, қайси клубдан?

- Тўғри, ҳар хил клублардан қизиқишлар бўлиб турибди. Лекин мен ҳозир бандман. Терма жамоада олдимизда катта масъулият бор. Бизнинг олдимизга қўйилган мақсад турибди. Бу мақсадга эришиш учун қўлимдан келганича ҳаракат қиламан. Ҳозир бошқа жойга кетиш ниятим йўқ.

Шуҳратбек Жўраев.