Parij-2024 uchun qancha chipta chiqarilgani e’lon qilindi

Parij-2024 Olimpiya va Paralimpiya o‘yinlari uchun umumiy hisobda 13.4 million dona chipta sotuvga chiqariladi. Bu haqda tashkiliy qo‘mita ma’lum qilmoqda. Ulardan 10 milliontasi Olimpiya, 3.4 milliontasi esa Paralimpiya o‘yinlariga ataladi.

Qo‘shimcha qilinishicha, mazkur chiptalar sotuvi raqamli platforma orqali yo‘lga qo‘yiladi. Bu musobaqani tomosha qilish uchun keladigan muxlislarga qulaylik yaratishi maqsadida amalga oshirilmoqda. Platforma sotuvi tenderga qo‘yilgan bo‘lib, hozirgacha uni yutib olish uchun mamlakatning 3 yirik kompaniyasi raqobat olib bormoqda.

Olimpiya o‘yinlari chiptalarning bir milliontasi 24 evro (26.5 AQSh dollari) va 500 000 dona Paralimpiya o‘yinlari chiptasi 15 evro (16.5 AQSh dollari) narxida bo‘ladi. Bunda eng ommabop hisoblangan engil atletika, suzish va boshqa yo‘nalishlardagi bahslar uchun chiptalar ham ko‘zda tutilgan. Olimpiya o‘yinlariga mo‘ljallangan chiptalarning yarmi 25-50 evro (26.5-55 AQSh dollari) qilib belgilanishi kutilmoqda.