Парвиз Абдумавлонов: "Эркебўлан Токтарга қарши октагонга кўтариладиган ўзбекистонлик жангчи маълум!"

Хабарингиз бор, ўзбекистонлик кўплаб ММА жангчилари Қозоғистоннинг “Октагон” промоушенида ўз жангларини ўтказиб келишмоқда.

Албатта, бу борада спортчиларимизга “Андердог” компаниясининг мутасаддилари Парвиз ҳамда Фарруҳ Абдумавлоновнинг хизматлари катта. Айнан улар мазкур промоушеннинг юртимиздаги муҳим вакиллари ҳисобланади.

Биз Парвиз Абдумавлонов билан боғланиб, “Октагон” промоушенидаги юртдошларимизнинг навбатдаги жанглари борасида саволлар билан мурожаат қилдик.

- “Андердог” менежерлик компаниясининг асосий мақсади нимадан иборат?

 - Мақсадимиз ёш истеъдодларни топиб тарбиялаш ва келажакда молиявий жиҳатдан яхши шартномалар тақдим этиш баробарида юртимиз шарафини халқаро ареналарда муносиб ҳимоя қилишига кўмакчи бўлиш, десак муболаға бўлмайди.

- Яна Ўзбекистонда турнир ташкил этиш бўйича режалар мавжудми?

- Албатта, 26-27 августда Ўзбекистонда навбатдаги турнирни ўтказиш режалаштирилмоқда. Яқин кунларда бунга расман аниқлик киритилади.

- Эркебулан Токтарнинг Йигитали Мамажонов ёки Одилхон Камалов билан жанги бўлиши қанчалик ҳақиқат?

-  Йигитали борасида бирор фикр билдира олмайман. Лекин Одилхон Камалов ёки Ҳумоюн Тўхтамуродов билан унинг жанги бўлади. Бироқ, санаси ва қайси турнирда эканлиги борасида аниқ маълумот бера олмайман.

- Навбатдаги турнирда яна қайси вакилларимиз жанг қилади?

- Лазизхон Ўзбеков, Муҳаммаджон Қурбонов, Суҳробжон Отажонов ва Фахриддин Мардиевнинг жанг қилиши аниқ бўлиб улгурган. Яна бир нечта қўшилиши мумкин.

- Маълумотларга қараганда юқорида санаб ўтган юртдошларимиздан бири чемпионлик жангини ўтказар экан?

- Ҳа, Фахриддин Мардиев ярим ўрта вазн (77.1 кг) тоифаси чемпиони Бауржан Куанишбаевга қарши титул учун октагонга кўтарилади.