"Пахтакор" мураббийи навбатдаги баҳс олдидан нималар деди?

Осиё Чемпионлар лигаси гуруҳ босқичининг сўнгги тур учрашувида "Пахтакор" клуби "Шаҳр Ходро"ни 1:0 ҳисобида мағлуб этди.

Учрашувдан кейинги матбуот анжуманида "шерлар"нинг ёрдамчи мураббийи Питер Хюистра иштирок этди ва ўз фикрларини билдириб ўтди. Бу ҳақда, "Пахтакор" матбуот хизмати хабар берди.

"Бугунги ғалабадан жуда хурсандмиз. Ўйин бошлангунча, биз гуруҳимиздаги ўзгариш ҳақида билмагандик. Мақсадимиз бу баҳсда ютиш эди ва фақат шу тўғрисида ўйладик. Ушбу ғалаба нафақат жамоамиз, балки ўзбек футболи учун ижобий ҳодиса, деб ҳисоблайман.

Шотада коронавирус аниқлангани ҳаммамиз учун кутилмаган ҳол бўлди. Айнан у туфайли шу ердамиз, шу даражага етиб келдик. Арвеладзе "Пахтакор" лойиҳасида катта ўрин тутадиган инсонлардан бири. У нафақат ўзини, балки бошқаларни ҳам жуда аяйди. Афсуски, ушбу пандемияни бошқаришнинг имкони йўқ. Шота билан уч йилдан бери ишлаб келяпмиз. Бизда ажойиб мутахассислар ва футболчилар йиғилган. Ўйинчилар профессионал ва ўз ишига нисбатан жуда интизомли. Машғулотларда биргаликда меҳнат қилиб, ўйинларга тайёрланишда давом этамиз. У ҳам ўз маслаҳатларини беради, қандай машғулот ўтказиш, ўйнаш, рақибнинг имкониятлари борасида маслаҳатлашамиз.

Гуруҳдан чиқиб, босимдан халос бўлдик, деб ўйламайман. Чунки мусобақанинг ҳал қилувчи қисми олдинда. Бу ерда хато қимматга тушади. Биз олдимизда турган уч ўйинни ўйнашга интиламиз.

Биз "Ал-Ҳилол"нинг мусобақадан четлатилганини билмасдан майдонга тушдик. Шу сабабли таркибни ўзгартириш имкони йўқ эди. Лекин футболчилар ўйин суръатини сақлаб қолишида бир тарафдан бу яхши бўлди. Масалан, Жалол сингари ўйинчилар ҳамиша футбол ўйнашни ёқтиришади, уларнинг хоббиси ҳам футбол. Жамоавий ҳаракатлар яхшироқ кўриниш олишида ҳам бу фойдали.

"Истиқлол" мусобақада биздан иккита камроқ ўйин ўтказди. Бу уларга фойда ёки зарар эканини учрашувда билиб оламиз. Биз бор кучимизни ишга солишга уринамиз," - деди Хюистра.