"Пахтакор" мураббийи: "Стадионда футбол ўйнаш керак, муштлашиш эмас"

Суперлиганинг 4-туридан ўрин олган "Пахтакор" ва "Навбаҳор" ўйини мезбонларнинг минимал ҳисобдаги ғалабаси билан якунланди. Баҳсдан кейинги матбуот анжуманида "шерлар" устози Славче Войнески ўз фикрлари билан ўртоқлашди.

"Биринчи бўлиб футболчиларимни табриклайман. Ўйин жуда қийин бўлди. Ҳар томонлама чарчадим. Ҳис ҳаяжонларга тўла ўтирибман.

ЎУчрашув боришини назорат қилдик. Тўп назорати бизда бўлди. Якунда киритилган гол орқали ғалаба қозонадик. Биласизми, бир неча кун давомида ихтиёримизда 12-13 нафар футболчи бор эди.  Ўйинчиларимиз турли хил ёшдаги миллий жамоаларда эди. "Навбаҳор"дек кучли рақибга тўлиқ таркиб билан тайёрлана олмадик. Шу жиҳат бизга панд бериши мумкин эди.  Бугун қандай ҳисобда бўлишиданқатъи назар ғалаба қозонишни мақсад қилгандик.

Ўйиндан кейин юзага келган ҳолатлар мени хафа қилди. Учрашув якунида бундай муштлашувлар, профессионал футболчига мос бўлмаган ҳаракатлар умуман керак эмас. Ҳар қандай жамоа мағлубиятни қабул қилишни билиш керак. Бу вазият "Навбаҳор" учун уят. Биз ҳам келаси давра Наманганга бошимизни баланд кўтарган ҳолда боришни хоҳлаймиз. Умид қиламанки, ЎФА бунга муносабат билдиради.

Ўйин яхши бўлди. Стадиондаги атмосфера ажойиб. Майдондаги футболчиларнинг бир-бирига ҳурмати ҳам аъло даражада бўлди. Беллашув якунлангач, икки томон бундай муштлашиши керак эмас. Бу ҳеч қандай қоидаларга тўғри келмайди. Стадион футболи ўйнайдиган жой", - деди мураббий.