"Пахтакор"га осон, "Насаф"га қийин. "Навбаҳор"гачи?

Тез орада Суперлигада энг муҳим палла бошланади. Хўш, ҳозир чемпионлик учун кураш олиб бораётган жамоаларнинг қай бири тақвимдан хурсанд бўлиши мумкин? Яна кимлар учун мусобақа якунидаги ўйинлар анчагина кучли рақиблар билан тўқнаш келишга мажбур қилмоқда? Бугун кучли тўртликдаги жамоаларнинг чемпионат якунига қадар кимларга қарши тўп тепишини кўриб чиқамиз!

4-ўрин. “Суғдиёна”

Амалда чемпионлик пойгасидан чиқиб кетган бўлса-да, расман ҳали курашда иштирок этаётган “Суғдиёна” мусобақа сўнгида қолганларга нисбатан анча енгилроқ рақиблар билан куч синашади. Жиззахликлар ўзидан олдинда кетаётганлардан фақат “Насаф” меҳмони бўлади, холос. Бақоев шогирдларида мавсумни юқори нотада якунлаш имкони бор. Грандларнинг барчаси ўзаро ўйинларда очко бой бериши аниқ.

Бу вазиятда ўртамиёна клубларга қарши беллашувларда “бўрилар” очко жамғаришда давом этса, якунда кучли учликда ҳам бўлиши ҳеч гап эмас. Умуман олганда, тақвим жиззахликларга пистирмада кутиш ва керак пайтда турнир жадвалининг юқорироғини ишғол этиш имконини тақдим этмоқда.

3-ўрин. “Пахтакор"

“Шерлар” бутун мавсум давомида жуда кўп кераксиз вазиятларда бой берилган очколар сабабли пешқадамга айлана олмади. Максим Шацких келгач, вазият бироз ижобий томонга ўзгара бошлади. Ҳозир, “Пахтакор” урилган ва ўтказиб юборилган голлар сони борасидагина Қарши клубдан ортда бормоқда. Эътиборлиси шундаки, тошкентликлар қолган 7 та ўйиннинг атиги иккитасини меҳмонда ўтказади.

Аниқроқ қилиб айтсак, амалдаги чемпион фақат “Сурхон” билан меҳмонда ўйнайди. “Бунёдкор” билан баҳсда жамоа ўзини меҳмондагидек ҳис этмаса керак. "Пахтакор" мухлисларини хурсанд қилаётган яна бир омил бор: “Насаф” билан уйдаги тўқнашув. Агар майдон эгалари “аждарлар”дан 3 очко олса, олтин медаллар тақдири тўлиқ ўз қўлларига ўтади. Қолган жамоалар ўзининг барча ўйинида зафар қучса ҳам, “шерлар”нинг очко йўқотишини кутишга мажбур. Сўнгги 7 турдаги ўйинларнинг 6 таси Тошкентда ўтиши Шацких шогирдларига чемпионлик пойгасида яхшигина импульс бериши аниқ.

2-ўрин. “Навбаҳор”

Барча-барчаси Самвел Бабаян жамоасининг ўз қўлида эди, аммо “Суғдиёна” билан ўйинда бой берилган 2 очко “Навбаҳор”нинг турнир жадвалидаги устунлигини йўққа чиқарди. Бир қарашда, “лочинлар” Суперлиганинг ўртамиёна жамоалари билангина майдонга тушадигандек туюлиши мумкин, аммо сўнгги турларда “Нефтчи”, “Металлург” сингари клублардан 3 очко тортиб олиш осон бўлмаслиги аниқ.

Шунга қарамай, “Навбаҳор”да чемпионлик учун яхшигина имконият бор. “Пахтакор” ёки “Насаф”нинг биргина қоқилиши наманганликларни пойгада олдинга чиқиб олиши учун етарли бўлиши аниқ. Боз устига, "лочинлар"да 6 очколик ўйинлар қолмади. Чемпионлик учун асосий даъвогар “Насаф” ва “Пахтакор” бўлса-да, “Навбаҳор” уларни зимдан таъқиб қилиб келмоқда.

1- ўрин. "Насаф"

Суперлигада пешқадамлик қилаётган “аждарлар”ни олдинда нақд еттита жанг кутиб турибди. Уларнинг биринчиси жуда кўп нарсани ҳал этиб бериши мумкин. Рўзиқул Бердиев шогирдлари кейинги турда “Пахтакор” билан куч синашиш мақсадида Тошкентга ташриф буюради. Кейин, ўз уйида Улуғбек Бақоев шогирдлари билан тўқнаш келади. Десертга Навоийда Лазаревичнинг "жангари йигитлари" “аждарлар”ни синовдан ўтказади.

Ҳозир, Бердиев жамоаси яхши формада. Мавсум ўртасида қаршиликлар сафига келиб қўшилган легионерлар мана энди катта саҳнага чиқиши керак. Шунингдек, “Насаф” етакчилари қаҳрамонлик кўрсатишига тўғри келади. Бу ўртага 30 йиллик орзу тикилган еттита ўйин. Қаршилик чарм тўп усталарининг хато қилишга ҳаққи йўқ! Олдинда “Насаф”ни кутаётган рақибларга назар солар экансиз, буни уддалаш осон бўлмаслигини англаш қийин эмас. Шунга қарамай, Суперлига олтин медаллари учун “Насаф” ҳозир кураш олиб бормаса, кейин бу қадар қулай имконият бўлмаслиги аниқ.

Яҳёхўжа Улуғхўжаев