Пенальтилар бўйича "мутахассис"нинг "Қизилқум"га қандай келиб қолганини биласизми?

Биринчи даврада “Андижон” сафида беш марта пенальтидан гол уриб жамоасининг тўпурари бўлиб турган ярим ҳимоячи Жамшид Ҳасанов иккинчи даврани Навоийнинг “Қизилқум” клубида ўтказади. Унинг кетиши эса андижонликлар учун катта йўқотишга айланса ҳам ажаб эмас. Чунки у жамоадаги энг тажрибали ўйинчи бўлиб турганди.

Афсуски, клуби уни ҳам сақлаб қола олмади. “Қизилқум” бўлса, қайтанга ўз сафига яна бир яхши савиядаги ижрочини қўшиб олди. Лекин Ҳасановнинг клубдан кетиши ва янги жамоага кўчиб ўтиши қандай юз берди? “Андижон” нега уни сақлаб қола олмади? Ёки унинг ойлик маоши баландлик қилдими? Айнан мазкур масалалар юзасидан футболчи sports.uz сайтига барчасини очиқ ойдин гапирди.

“Андижон”дан кетиши ҳақида

-  Трансфер ойнаси очилишидан 10 кунча аввал клуб раҳбарлари билан гаплашиб, агар таклифлар бўлса, мени қўйиб юборишлари ҳақида сўраганман. Лекин бунга жавобан “Андижон” клубидагилар кетишимга рухсат беришмади, ҳаммаси яхши бўлади, жамоани кучайтирамиз, 3-4 нафар янги футболчилар келади, дейишганди. “Андижон”нинг охирги ўринда юравериши бизга жуда ноқулай бўлаётганди. Оиламиз, яқинларимиз олдида ҳижолатда қолаётгандим. Молиявий томондан ҳам муаммолар етарли эди. Бир ойлик маошимизни уч ойда бир олсак олардик. Бир сўз билан айтганда, мен яна “Андижон”да қоладиган бўлгандим. Кейин эса шу пайт клуб инқироз сабабли ёпилади, деган хабарлар чиқди. Биз меҳмонхонага борадиган пайтимизда борманглар, ўйин бўлмайди, жамоа ёпилар экан дейишди. Олдимда эса 5-6 та вариант бор эди. “Андижон”нинг ёпилишини эшитганлар менга яна қўнғироқ қила бошлашди ва музокараларга киришишимизни таъкидлашди. Эртасига таклиф билан чиққан клублар билан гаплашишни бошладим. Аммо шу пайт яна хабар чиқди, “Пахтакор” билан ўйин бўладиган бўлди, ҳамма йиғилишини айтишди. Ўйиндан кейин эса яна бир бор раҳбарият билан гаплашдим. Трансфер ойнаси ёпилишига тўрт кун вақт қолганди. Мен билан қизиққан клублар эса ўзингга пулни берамиз, “Андижон”дан ҳужжатингни ҳал қилгин, дейишди. Лекин бу осон ҳал бўладиган иш эмасди. Қолаверса, клубдагилар ҳам мени қўйиб юбормоқчи эмаслигини айтишди. Натижада бўлди, шу ерда қоладиган бўлдим, деб турганимда “Қизилқум”дан Ҳамид ака Актамов қўнғироқ қилиб, ўзим трансферингни ҳал қиламан, жамоамизга келасанми?, деб сўради. Шунга кўра, улар ўзлари трансферимни гаплашиб ҳал қилишди. 31 август куни “Қизилқум” билан шартнома туздим ва 3 сентябрдан Навоийда шуғулланишга киришдик.

Пенальтилар ижрочиси

-  Тўғри, олдин фақат “Машъал”да пенальти тепардим. Александр Хомяков билан ушбу клубда ишлаганим боис мени яхши биларди. “Андижон”га келганимдан кейин биринчи кунданоқ, мени пенальти тепишимни тайинлаганди. “Қўқон-1912”да пенальти тепмаганимнинг сабабини эса ҳамма яхши билади. У ерда пенальтиларнинг қироли Мурод Холмуҳаммедов бор. У 11 метрлик нуқтадан ҳали адашмаган. “Қизилқум”да ҳам пенальти тепаманми? Бу ҳақида бирор нима айта олмайман. У ерда тажрибали ўйинчилар кўп. Агар мураббийлар ва футболчилар менга ишонч билдиришса, йўқ демасдан пенальтини тепавераман.

Янги жамоасидаги илк таассуротлар

-  Янги жамоам ҳақида илиқ фикрдаман, албатта. Мени ажойиб кутиб олишди. У ердаги аксарият ўйинчилар ҳам таниш эди. Машғулотларда ҳам ҳазил мутойибалар билан ишлаяпмиз. Асло бегонасираш деган нарса йўқ. Мени эски танишларидек қабул қилишди. Мана шундай илиқ муҳит бўлса, ижобий натижаларга ҳам эришиш осон бўлади.

“Андижон”нинг муваффақиятсизлигига сабаб нима эди?

-  “Андижон” ёш жамоа эди, тўғриси, тажрибали футболчилар ҳам кўп эмасди. Маҳаллий ўйинчилардан ташкил топган эди. Олдинги чизиқда ҳужумчиларимизга вазиятлардан фойдаланишда совуққонлик етишмади. Шунинг ҳисобига кўп дуранг ўйнадик ва мағлубиятларга учрадик. Ҳаммасига ўзимиз сабабчимиз. Футболда сен урмасанг, сенга уришади, деган гап бор. Мураббий ҳам кўрсатмалар бериш чоғида ҳужумчилар ҳам гол уриши кераклигини, тинмай пенальти орқали гол уравермаслигимиз лозимлиги ҳақида айтарди. Биринчи даврада эса бирорта ҳужумчи гол ургани йўқ. Иккинчи даврада эса салбий ҳолатлар ижобийликка айланади деб умид қиламан. Бунинг учун “Андижон”га омад тилайман.

Ойлик маоши тўғрисида

-  “Андижон”да кимни қанча маош олишини билмасдим. “Қизилқум” эса менинг трансферимни сотиб олганини биламан холос. Ахир ўзимдан-ўзим кетиб қолганим йўқ. Сизни трансферингизни ҳал қилаётган жамоа албатта ишонч билдиради, ахир бежизга бу ишга қўл урмайди-ку. Шу сабабли Актамовга агар ишимни ҳал қилсангиз, майли бораман деб айтганман. Тўғриси, “Қизилқум” мени сотиб олганини 30 август куни билдим. Унгача эса ҳужжатим “Андижон”да, у ерда қолсам керак деб ўйлагандим. Лекин 30-куни кечки пайт қўнғироқ қилиб, эртага ПФЛга борасан, ўша ерда шартнома тузиб расмийлаштирамиз дейишди. Гапнинг очиғи, “Андижон”да ойлик маошим катта эди, деган гапларга қўшилмайман. Ҳамма биладики, у ерда катта маош йўқ. Тўғри, кимдандир бироз кўпроқ олгандирман, аммо 3-4 баробарга ортиқ эмасди.