Пеп Гвардиола: "Кайл Уокерга қизил карточка дарс бўлиши керак"

"Манчестер Cити" бош мураббийи Пеп Гвардиола "Лейпциг"га қарши учрашувдаги (2:1) мағлубият ҳақида фикр билдирди.

"Шаҳарликлар" "Лейпциг"га мағлуб бўлишидан олдин Чемпионлар лигаси А гуруҳида биринчи ўринни кафолатлаб улгурган эди. Аммо ҳимоячи Уокер рақиб ҳужумчиси Андре Силвага қилган қўполлиги туфайли қизил карточка олди. Бу ҳақда Гвардиола шундай деди:

"Кайл Уокер биз учун жуда муҳим ўйинчи. Уни бу тарзда йўқотиш ачинарли. Умид қиламанки, Кайл бундан сабоқ олади. Қизил карточка бизни ранжитди.

Биринчи таймда бизга ритм етишмади. Ўйиннинг иккинчи қисмида эса биз яхшироқ ҳаракат қилдик. Афсуски, баъзи хатоларга йўл қўйди ва ютқаздик. Уларда жуда яхши жамоа бор. Биз буни аввалдан билгандик. "Лейпциг"ни ғалаба билан табриклайман".