Peres “Oltin to‘p” sohibini “Real”ga shaxsan o‘zi olib kelmoqchi

“Real” yozgi transferlar davrida “Manchester Siti”ning etakchi yarim himoyachisi Rodrini olishga bir necha bor urinib ko‘rdi, lekin maqsadiga eta olmadi.

“Qirollik klubi” prezidenti Florentino Peres ispaniyalik “Oltin to‘p” sohibini jamoaga olib kelish fikridan qaytgani yo‘q va bu transferni asosiy maqsadi sifatida belgiladi.

Cadena Ser nashrining yozishicha, Peres agar uning aralashuvi zarur bo‘lsa, Rodri bilan hech qanday vositachilarsiz shaxsan o‘zi muzokara qilishga tayyorligini bildirdi. Bundan tashqari, klub xo‘jayini transfer amalga oshishi uchun Rodrining o‘zi ham  bu yo‘lda jiddiy qadam tashlashi zarurligini aytdi.

“Manchester Siti” esa, tajribali o‘yinchini saqlab qolmoqchi. Ular Rodrining yana ikki yil davom etadigan shartnomasini uzoqroq muddatga uzaytirmoqchi. Yangi bitimga ko‘ra, ispaniyalik yulduz klubdan Erling Xolanddan keyin eng katta maosh oladigan ikkinchi o‘yinchiga aylanadi.

Rodri Xosep Gvardiola qo‘l ostida 2019 yildan beri o‘ynab keladi. Shu paytga qadar barcha turnirlarda 265 marotaba maydonga tushgan yarim himoyachi o‘z hisobiga 26 ta gol va 32 ta assist rasmiylashtirib qo‘ygan.