Перес Хаби Алонсони истеъфога чиқаришда хато қилганини тан олди

"Реал" президенти Флорентино Перес Хаби Алонсони бош мураббийликдан олиш масаласида хатога йўл қўйганини ҳисобламоқда.

Алонсо 12 январь куни Испания Суперкубоги финалида "Барселона"дан 2:3 ҳисобидаги мағлубиятдан сўнг лавозимини тарк этган, унинг ўрнини Альваро Арбелоа эгаллаганди.

"ABC" маълумотига кўра, Перес мураббийни декабрь бошида "Сельта"га қарши чемпионатдаги 1:2 ҳисобидаги мағлубиятдан кейинёқ истеъфога чиқармоқчи бўлган. Бироқ клуб бош директори Хосе Анхель Санчес уни бироз кутишга кўндирган. Флорентинонинг фикрича, мураббий алмашинуви кеч амалга ошган ва бу Арбелоа учун вазифани мураккаблаштирган.

Манбага кўра, клуб президенти Арбелоадан миннатдор ва унга алоҳида ҳурмат билан қарайди, аммо уни келаси мавсумда бош мураббий сифатида қолдириш ниятида эмас. Переснинг фикрича, на Алонсо, на Арбелоа кутилган ишончни оқлай олган.

"Реал" раҳбари жамоа футболчилари сўнгги икки мавсумга нисбатан яхшироқ ўйин кўрсатаётганини ва топ даражадаги мураббий уларнинг салоҳиятини тўлиқ очиб бера олишини ўйламоқда. Шу боис, у ёзда жамоани ким бошқариши масаласини синчиклаб кўриб чиқмоқчи.

Шунингдек, Перес таркибда катта инқилоб шарт эмас, деб ҳисоблайди. Клуб марказ ва ўнг қанот ҳимоясини, шунингдек ярим ҳимояни кучайтиришни режалаштирмоқда. Қолган позициялар эса фақат кичик тузатишларга муҳтож деб баҳоланмоқда.

Мадридликлар "Комо"дан Нико Пас ва "Осасуна"дан Виктор Муньосни қайта сотиб олиш имкониятини кўриб чиқмоқда. Ижарадан "Лион"да тўп сураётган Эндрик ҳам қайтиши кутилмоқда.

Франко Мастантуоно ижарага берилиши, Гонсало Гарсия эса қайта сотиб олиш шарти билан сотилиши мумкин.

Айни пайтда "Реал" 32 турдан кейин 73 очко билан Ла Лигада иккинчи ўринда бормоқда. Жамоа бир ўйини кам бўлган "Барселона"дан 6 очко ортда қолмоқда.