"Prague Junior European Cup 2025" турнири. Ўзбекистон Японияни ортда қолдириб, 1-ўринни эгаллади

Чехия пойтахти Прага шаҳрида ёшлар ўртасида дзюдо бўйича ўтказилган "Prague Junior European Cup 2025" мусобақаси якунланди. 

Дунёнинг 4 қитъаси 32 давлатидан жами 428 нафар дзюдочи қатнашган Европа Кубоги Камол Муродов бош мураббийлигидаги Ўзбекистон ёшлар терма жамоаси учун омадли келди. 

Дзюдочиларимиз икки кунлик муросасиз беллашувларда 3 та олтин, 1 та кумуш, 2 та бронза медали билан умумжамоа ҳисобида 1-ўринни эгаллади. 

Япония ва Сербия терма жамоалари ҳам биз каби 3 тадан олтин ва 1 тадан кумуш медални қўлга киритишди. Иккита бронза медали якунда умумжамоа ҳисобидаги пешқадамлигимизни таъминлаб берди. Шунинг ўзиёқ Прагадаги турнир қай даражада муросасиз курашлар остида ўтганидан далолат бермоқда. 

Олтин медаллар:
-66 кг: Дилшодбек Ҳамроев
-81 кг: Самариддин Мухибиддинов  
+78 кг: Умида Ниғматова

Кумуш медал:
+100 кг: Фазлиддин Рафиков 

Бронза медаллар:
-60 кг: Самариддин Қўчқоров
-63 кг: Сарвиноз Ҳусанова

Бу ҳақда Ўзбекистон дзюдо федерацияси матбуот хизмати хабар бермоқда.