Премьер-лига клуби легионеримизга омад тилади!
Жорий мавсумдан эътиборан Қозоғистон премьер-лигасида “Актобе” шарафини ҳимоя қилаётган Игорь Сергеев Ўзбекистон миллий терма жамоасининг навбатдаги ўқув-машғулот йиғинига чақиртирилди.
“Актобе” клуби расмий сайтида клуб ҳужумчиси терма жамоадан таклиф олганини ҳақида баёнот эълон қилди.
“22-30 март кунлари Ўзбекистон миллий терма жамоаси навбатдаги ўқув-машғулот йиғинини ўтказади.
Терма жамоа раҳбарияти 2022 йилги жаҳон чемпионати ва 2023 йилги Осиё кубоги мусобақаларининг қўшма саралаш турнирига тайёргарлик кўриш мақсадида ташкил этилаётган йиғин учун таклиф этилган кенгайтирилган таркибга 29 нафар футболчини жалб қилган.
Ўқув-машғулот йиғини давомида иккита халқаро ўртоқлик учрашуви ўтказилиши кутилмоқда. Ўзбекистон терма жамоаси 25 март куни Гана ва 29 мартда Ироқ футболчиларига қарши майдонга тушиши белгиланган.
Жамоамиз ҳужумчиси Игорь Сергеев ҳам терма жамоадан таклиф олди. У 2013 йилдан буён мунтазам равишда мамлакат бош жамоасига чақиртирилмоқда.
Сергеевга бўлажак ўйинларда омад тилаймиз”, - дейилади “Актобе” расмий сайтидаги баёнотда.
Игорь Сергеев Қозоғистон премьер-лигасининг иккинчи турида “Тобол” жамоаси дарвозасини ишғол қилиб, жамоасига бир очко келтирди. Бу ҳамюртимизнинг Қозоғистон премьер-лигасидаги дастлабки голи бўлди. Таъкидлаш жоизки, Сергеев Қозоғистон премьер-лигасининг энг қиммат ўйинчилари ўнлигига ҳам киритилган.
Игорь Сергеев ўтган йили “Пахтакор”нинг Ўзбекистон чемпионатлари тарихидаги энг зўр тўпурарлари рўйхатида иккинчи ўринга кўтарилиб олган эди. Моҳир ҳужумчи ўзини тарбиялаган клуб учун миллий чемпионатда 180 та учрашув ўтказиб, голлари сонини 101 та етказди.
Шунингдек, Игорь фаолияти давомида Хитой чемпионатида “Бэйцзин Гоань” (14 та ўйин, битта гол) ҳамда Бирлашган Араб Амирликларида “Аз-Зафра” (6 та ўйин, битта гол) шарафини ҳимоя қилган.
Тажрибали ҳужумчи “Пахтакор” сафида тўрт карра Ўзбекистон чемпиони, икки карра мамлакат кубоги соҳиби, бир бор чемпионат бронза медали совриндори бўлган. Бундан ташқари, Игорь Сергеев 2015 йилги чемпионат якунларига кўра, мусобақанинг энг яхши тўпурари унвонига сазовор бўлган.
Игорь Сергеев илк маротаба Ўзбекистон миллий терма жамоасига 2013 йилнинг 10 сентябрида Иорданияга қарши ўтказилган учрашувда жалб қилинган эди. 15 октябрь куни терма жамоамиз сафидаги иккинчи ўйинида Вьетнам дарвозасини ишғол қилиб, дебют голини киритган. Шундан бери, бош жамоа таркибида 53 та беллашувда майдонга тушиб, рақиблар дарвозасини 17 марта аниқ нишонга олган.
Игорь Сергеев Ўзбекистон миллий терма жамоаси тўпурарлари рейтингида саккизинчи ўринни эгаллаб турибди. Фаолиятини давом эттираётган футболчилардан фақат асосий ҳужумчи Элдор Шомуродов (21 та гол) ва жамоа сардори Одил Аҳмедовдан (20 та гол) ортда қолмоқда.
Комментарии