Премьер-лигага яна бир ўзбек легионери келади!
Бу йил Қозоғистон Премьер-лигасини яна алоҳида қизиқиш билан кузатамиз. Чемпионат бошланиши арафасида Туркистоннинг “Турон” клуби ўз сафига тўрт нафар ўзбек футболчисини қўшиб олгани ҳақида хабар берган эди.
Янги чемпионатда Шаҳбоз Умаров, Одилбек Абдумажидов, Хуршид Мухторов ва Беҳруз Асқаров туркистонликлар шарафини ҳимоя қилишга бел боғлаган.
Ўтган мавсумда Қозоғистон чемпионатида порлаган ўзбекистонлик ҳужумчи Жасурбек Яхшибоевнинг келажаги мавҳум бўлиб турганди. 27 ёшли ҳужумчи “Ордабаси” етакчиси эди. Жасурбек Яхшибоев мавсум давомида чемпионат тўпурарлари пойгасида иштирок этди. Чимкентликлар шарафини ҳимоя қилган легионеримиз Премьер-лиганинг 17 та ўйинида иштирок этиб, рақиблар дарвозасини 9 маротаба ишғол қилди.
Бироқ, чемпионатнинг охирги қисмига келиб, Жасурбек ҳакамни туртиб юборгани учун Тартиб-интизом қўмитаси томонидан тўртта учрашувга дисквалификация қилинди ва сўнгги учрашувларни ўтказиб юборишига тўғри келди. Шу боис, 27 ёшли футболчимиз тўпурарлар пойгасидан эрта чиқиб кетди.
Шунга қарамай, Жасурбек Яхшибоев бошқа индивидуал совринга эга бўлди. Маҳоратли ҳужумчимизнинг “Астана” дарвозасига киритган тўпи 2024 йилги мавсумнинг энг чиройли голи сифатида эътироф этилди.
Жасурбек Яхшибоев Қозоғистон чемпионатидаги тўрт ўйинлик дисквалификациядан кейин кўринмай қолганди. Легионеримиз Озарбайжоннинг “Нефтчи” клуби билан музокара олиб бораётгани, Ўзбекистонга қайтиши мумкинлиги ҳақида хабарлар тарқатилди.
“Ордабаси” яқингача Яхшибоевнинг номини ўз рўйхатида ушлаб турди.
Сўнгги маълумотларга қараганда, Жасурбек Яхшибоев Астананинг “Женис” клубига сафига қўшилиши кутилмоқда.
Нуфузли манба – vesti.kz сайти пойтахтликлар тажрибали ўзбек футболчисига жиддий қизиқиш билдираётгани ҳақида ахборот тарқатди.
“Женис” ўтган мавсумда мусобақа жадвалининг қуйи қисмидан жой олган. Бу гал астаналиклар юқори ўринлар учун курашмоқчи. Жамоа таркиби кучайтирилди. Transfermarkt порталида жамоа сафида айни пайтда олти нафар легионер борлиги кўрсатилган.
Янги мавсумда Беларусь, Словения, Грузия, Кипр, Польша ва Бразилиядан бир нафардан чарм тўп устаси “Женис” шарафини ҳимоя қилади. Яхшибоев улар қаторига еттинчи легионер бўлиб қўшилиши кутилмоқда.
Ўзбекистон миллий терма жамоасига номзод бўлган Жасурбек хориж мамлакатларида тўп тепиш бўйича катта тажрибага эга. Ўзбекистонда “Пахтакор”, ОТМК ва “Навбаҳор”да ўйнаган ҳужумкор футболчи юртимиздан ташқарида “Энергетик-БГУ”, “Шахтёр-Солигорск”, “Легия”, “Шериф” ва “Ордабаси”да фаолият юритган.
Яхшибоев Беларусь, Польша ва Молдова чемпионатилари ғолиби ҳисобланади. У клублар миқёсидаги 168 та учрашувда иштирок этиб, 41 та гол ва 21 та ассист муаллифи бўлган.
Шунингдек, Ўзбекистон миллий терма жамоасида ўнта учрашувда рақиблар дарвозасини икки маротаба ишғол қилган.
Гарчи Қозоғистон Премьер-лигасининг янги мавсуми старт олган бўлса-да, қишки трансфер ойнаси 3 апрелга қадар очиқ бўлади.
Фикрлар