Профессионал боксчимиз жаҳон чемпионига қарши жанг қилади

Халқаро бокс ассоциацияси томонидан 27 октябрь куни Тожикистоннинг Душанбе шаҳрида IBA Champions' Night турнири ўтказилади.

Ушбу мусобақанинг энг кўп кутилаётган жангларидан бирида ҳамюртимиз Азизбек Абдуғофуров ҳаваскорлар боксида амалдаги жаҳон чемпиони ҳисобланган Шарабутдин Атаев билан тўқнашади.

Таъкидлаш жоизки, Шарабутдин Атаев жорий йилнинг май ойида Тошкент шаҳрида ўтказилган жаҳон чемпионатида барча рақибларини мағлубиятга учратиб, фаолиятидаги энг нуфузли соврин – олтин медални қўлга киритди.

Россиялик боксчи бўлажак учрашув олдидан ўзининг устун томонларини айтиб ўтди.

— Булажак рақибим мен профессионал рингда тўқнаш келган боксчилар орасида энг жиддий ва кучлиси. Мен унинг жангларини томоша қилдим. У кўп россиялик боксчиларни мағлуб этганини эшитдим.

Мен Азизбек Абдуғофуровнинг жанг услубига ўхшаш усулда бокс тушадиганлар билан кўп тўқнашганман. Лекин бу галгиси профессионал бокс ва у ҳаваскорлар боксидан кескин фарқ қилади.

Мен жанг услубим иш беришига ва бўлажак жангда ғолиб чиқишимга ишонаман, - деди Шарабутдин Атаев “Матч ТВ” каналига берган интервьюсида.

Атаев ҳаваскорлар ўртасидаги мусобақаларда жами 67 та ғалаба ва 15 та мағлубият қайд этган. Профессионал рингда у бешта жангнинг барчасида ғолиб чиққан ва улардан учтасини рақибларини нокаут қилган.

Азизбек Абдуғофуров анча тажрибали боксчи. У ҳаваскорлар ўртасидаги фаолиятидан кейин профессионаллар ўртасидаги жангларда қатнашиб келмоқда. У дебютини 2016 йили бошлаган ва шу пайтга қадар 14 та ғалабага эришган ва бир марта мағлуб бўлган.

Азизбек профессионал рингда Гасан Гасанов (18-10-1, 14 КО), Дмитрий Чудинов (21-2-2, 13 КО) ва Фёдор Чудинов (26,-3-1, 17 КО) каби россиялик чарм қўлқоп усталарини мағлубиятга учратган. Бироқ Павел Силягин (13-0-1, 6 КО) билан Москвада бўлган баҳсда очколар ҳисобида имкониятни бой берди.

Айнан мана шу мағлубият Азизбек Абдуғофуровнинг профессионал фаолиятидаги ягона мағлубият бўлиб турибди.

Халқаро бокс ассоциацияси жаҳоннинг энг зўр чарм қўлқоп усталари иштирокидаги IBA Champions' Night турнирини 2022 йилнинг декабридан бери ўтказиб келмоқда. Тарихий биринчи мусобақага Бирлашган Араб Амирликларининг Абу Даби шаҳри мезбонлик қилган. Бугунги кунда ўта оғир вазн тоифасида дунёнинг энг кучли боксчиларидан бири ҳисобланган Баҳодир Жалолов ушбу нуфузли мусобақада ғолиб чиққан.

Шунингдек, 2023 йилнинг июль ойида Таиландда ўтказилган чемпионлар бокс кечасида Ҳасанбой Дўсматов, Мужибулло Турсунов ва Асадхўжа Муйдинхўжаев рақибларини мағлубиятга учратиб, мусобақа ғолиби бўлди.