Пролиганинг сўнгги иштирокчиси маълум

Бухоро давлат университетининг БухДУ клуби Пролиганинг 2026-йилги мавсуми учун сўнгги қатнашчи сифатида рўйхатдан ўтказилди. Бу ҳақда ЎзПФЛ хабар берди. 

БухДУ сўнгги икки мавсумни Биринчи лигада муносиб ўтказди. Ўтган мавсум айнан у иштирок этган минтақада Каттақўрғон, Лочин, БухДУ ўртасидаги рақобат кўпчиликнинг диққатини ўзига тортди. Гарчи бухороликлар минтақани кучли учликда тугатган бўлса-да, якунда мусобақанинг финалига қадар етиб борди ҳамда мавсумни 2-ўрин билан якунлади. 

Тошкент мезбонлик қилган финал учрашувига университет ректори Обиджон Ҳакимов ҳам ташриф буюрганди. Ўтган давр ичида университет қошидаги футбол клубининг Пролигада иштирок этиши юзасидан ишлар олиб борилди. Бухоро вилояти ҳокимлигининг амалий кўмаги билан Бухоро ва БухДУ клублари мавсум давомида вилоят футбол академиясига қарашли стадиондан фойдаланадиган бўлди. 

Қандай ҳолатда бўлмасин, БухДУ кетма-кет икки мавсум давомида Биринчи лигада исталган рақибга етарлича рақобат қила олди. Эндиликда университет жамоаси Пролигада ўз омадини синаб кўради.