ПСЖ Доннарумманинг келажаги бўйича қарор қабул қилди!

"Пари Сен-Жермен" 26 ёшли дарвозабон Жанлуижи Доннаруммани клубдан кетишига ундамоқда. Француз гранди уни 13 август куни "Тоттенхэм"га қарши ўтадиган Европа Суперкубоги учрашуви учун "Фриули" стадионидаги рўйхатга киритмади.

"RMC Sport" нашрининг хабарига кўра, парижликлар италиялик посбонга бошқа жамоага ўтишни тавсия қилмоқда. Доннарумманинг амалдаги шартномаси 2026 йил ёзига қадар мўлжалланган.

Инсайдер Фабрицио Романонинг таъкидлашича, Доннарумма ҳеч қандай ҳолатда ПСЖ билан шартномани узайтирмайди ва ёзда ёки кейинги мавсум эркин агент сифатида клубни тарк этади. Футболчининг атрофидаги шахслар бу вазиятни унга нисбатан ноинсофона деб ҳисобламоқда.

Эслатиб ўтамиз, ПСЖ яқинда "Лилль"дан Люка Шевальени 40+15 млн еврога харид қилди. Жамоа таркибида яна икки посбон — Матвей Сафонов ва Арнау Тенас ҳам бор.