ПСЖ Мбаппе ва Неймар зиддиятидан хавотирда

ПСЖ анчадан бери пишиб келаётган муаммога тезроқ ечим топиши керак бўлади. Жамоанинг икки юлдузи – Килиан Мбаппе ва Неймар ўртасидаги зиддият тобора кучайиб бормоқда.

Аслида франциялик ҳужумчи ўтган мавсум охиридан бошлаб, клуб хўжайинларидан бразилиялик юлдузни сотиб юборишни талаб қилиб келмоқда. Ҳозир келишмовчилик янада кучайган.

“Монпелье”га қарши учрашувда Мбаппе пенальтидан гол ура олмади. Мухлислар 23 ёшли ҳужумчини жамоанинг штатли пенальтичиси қилиб белгиланганига эътироз билдирилган постларни қўя бошлади.

Неймар эса, Мбаппе танқид қилинган иккита постга лайк босди.

Энди клуб хўжайинлари бош мураббий Кристоф Галтье ва спорт директори Луиш Кампуш иштирокида мажлис ўтказиб, футболчиларни келиштириб қўйишни талаб қилмоқчи.

Мбаппенинг агентлари бу зиддиятнинг авж олишида Неймарни айбламоқда.