ПСЖ Педри бўйича таклиф тайёрламоқда

ПСЖ «Барселона» ярим ҳимоячиси Педрини қўлга киритиш учун ҳаракат бошлади ва биринчи расмий таклифни тайёрламоқда. Бу ҳақда El Nacional нашри хабар берди.

Манба маълумотига кўра, парижликлар жаҳон ва Европа чемпиони бўлган футболчининг трансфери учун 90 миллион евро тўлашга тайёр. Қайд этилишича, Педрига қизиқиш «Манчестер Сити» ярим ҳимоячиси Родри билан боғлиқ вазиятдан кейин кучайган. Бош мураббий Луис Энрике айнан Родрини жамоада кўришни истаган, аммо испаниялик футболчи карьерасини давом эттириш учун «Реал»ни танлаган.

23 ёшли Педри 2020 йилдан бери каталонияликлар сафида тўп сурмоқда. Шу вақт ичида у жамоа таркибида 245 ўйин ўтказиб, 28 гол урди ва 33 голли узатма амалга оширди. У «Барселона» сардорларидан бирига айланган. Педрининг «кўк-анорранглилар» билан амалдаги шартномаси 2030 йил ёзигача мўлжалланган. Transfermarkt баҳосига кўра, футболчининг тахминий трансфер қиймати 150 миллион евро атрофида.