ПСЖдан кутилмаган юриш: “Ланс” билан бўладиган “олтин ўйин” қолдириладими?

​“Челси”га қарши иккита ўйин оралиғида бўлиб ўтиши керак бўлган “ПСЖ” – “Нант” учрашувини қолдириш ҳақидаги қарор ўз самарасини берди.

Чемпионлар лигасининг чорак финалига йўлланма олган пойтахт клуби, бу сафар “Ливерпуль” билан бўладиган икки ўйин ўртасига тўғри келадиган “Ланс” – ПСЖ (11 апрель) баҳсини ҳам муддатини ўзгартириш бўйича сўров юбориш ҳақида ўйламоқда.

​- Мен ҳали янгиликларни кутишни хоҳлардим. Ҳар бир жамоа мусобақада ўйнаш учун энг яхши шароитларни топишга ҳаракат қилади, лекин ҳар бир томоннинг манфаатларини ҳам тушуниш мумкин, - дейди Луис Энрике матбуот анжуманида.

​Ушбу “Ланс” – ПСЖ қарама-қаршилигининг ўзига хос жиҳати шундаки, бу Лига 1 пешқадами ва унинг энг яқин таъқибчиси (2-ўрин) ўртасидаги марказий баҳс ҳисобланади.