Пёнчхан-2018. Миша Ге олимпиададаги чиқишларини якунлади

Аввал хабар берганимиздек бугун ҳамюртимиз Миша Ге Пёнчханда бўлиб ўтаётган қишки олимпиада баҳсларининг Фигурали учиш турида ўзининг эркин дастури бўйича чиқишини намойиш қилди.

Унга кўра ҳакамлар ўзбекистонлик спортчининг ҳаракатларига 161,04 балл қўйишди. Ге эркин дастурда 17-ўринни банд қилди.

Спортчимизнинг бундан аввал қисқа дастурда тўплаган баллари билан қўшиб ҳисоблаганда умумий 244,94 баллни ташкил этди ва Ге бунда ҳам 17-ўринни банд қилди.

Бу борада япониялик Юдзуру Ханю умумий ҳисобда 317,85 балл билан ғолибликни қўлга киритган бўлса, кумуш медаль ҳам унинг ҳамюрти Шома Унога (306,90) насиб этди. Бронза медали эса испаниялик Хавьер Фернандес (305,24) сазовор бўлди.

Фикрлар

Фикр қолдириш учун авторизациядан ўтинг!