Қачонгача? Ўзбекистон футбол ҳакамлари маркази ва ЎзПФЛга мурожаат!

Сўнгги пайтларда Ўзбекистон Суперлигасида ишлаётган ҳакамлар ОАВда кўплаб муҳокамаларга сабаб бўлмоқда.

Кўп ҳолларда ўзбек ҳакамлари чемпионатимизда ВАР тизими ишга тушгач, ўз устида ишлашни тўхтатди ёки оддий вазиятларда ҳам қарор чиқаришга чўчиб қолгани қабилида гаплар эшитиб қоламиз. Охирги пайтларда эса фикрлар қайсидир маънода ўзини оқлаётганига гувоҳ бўлмоқдамиз. Боиси, сўнгги пайтларда ҳакамларимиз жуда ҳам кулгули хатоларга йўл қўймоқда. Бу хатолар эса клубларимизнинг ўйинига жиддий таъсир ўтказмоқда.

Мисол учун, яқинда 19-тур доирасидаги “Навбаҳор” – “Қизилқум” учрашувидаги ҳолат бунга яққол мисол бўла олди. Ўйин якуни арафасида Азим Аҳмедов ўз жарима майдончаси ичида тўпни қўли билан ўйнади, бироқ бош ҳакам Абдурашид Худойберганов эса 11 метрлик жарима зарбаси белгиламади. Рўй берган ҳолат Эксперт-ҳакамлар комиссияси томонидан кўриб чиқилди ва якунда пенальти бор эканлиги ҳамда рефери ушбу вазиятда хатога йўл қўйгани айтилди.

Ҳакам эса нари борса 5 та ўйинга четлатилади. Барчаси шу билан ёпилди. Вазият эса барчани эсидан чиқиб кетади. Аммо ўша ўйинда камида  1 очкодан қуруқ қолган “Қизилқум” клуби раҳбарияти дардини кимга айтади? Ахир Навоий клуби ҳам олтин медаллар учун даъвогарлар қаторида бор эди-ку?! Улар ҳакамнинг йўл қўйган хатоси сабаб чемпионлик учун даъвогар қаторидан қолиб кетиши адолатданми?

Яна бир қизиқ ҳолатни қўшимча қиламиз. 2022 йил 3 сентябрь куни Ўзбекистон кубоги 1/4 финал “Насаф” – “Локомотив” учрашувнинг ҳакамлари Ғайрат Жўраев, Санжар Шоюсупов, Алишер Усмонов, Абдурашид Худойберганов учрашувида хато ва камчиликлар кузатилган бўлса-да, назоратчи Зокир Қодиров томонидан бош ҳакам ва захира ҳакамига паст баҳо, бироқ ёрдамчи ҳакамлар баҳолари кўтариб кўрсатилган. Эксперт ҳакамлар комиссияси талабига кўра мазкур ҳолат бўйича тегишли чора кўриш сўралгани туфайли ҳакамлар қўмитаси томонидан ҳолат атрофлича муҳокама қилинди ва тегишли қарор чиқарилди.

Энди Ўзбекистон футбол ҳакамлари марказидан изоҳ талаб қиламиз. Бир неча ҳафта олдин Ўзбекистон кубогида ишлаган ва бир қанча вазиятларда хатога йўл қўйиб, тегишли тарзда огоҳлантириш ва жарима жазосини олган ҳакамни олтин медаллар учун даъвогарлик қилаётган “Навбаҳор” – “Қизилқум” учрашувига нега тайинлашди? Худойбергановдан бошқа тажрибалироқ реферилар йўқ эдими?

Тўғри, бу каби ҳолатлар исталган чемпионатда кузатилиши мумкин. Аммо ҳар бир турда эмаслиги аниқ. Чунки бу каби ҳолат Суперлигада илк марта кузатилаётгани йўқ. Бунгача ҳам ҳакамлик қурбонига айланган жамоалар жуда кўп бўлган.

Саволлар кўп, аммо жавоб берадиган бирорта шахс топилмаяпти. Аслида, юқоридаги ҳолатларга ортиқча тўхталмоқчи эмасмиз. Бироқ Ўзбекистон чемпионатида кундан-кунга интрига ошиб бораётган бир пайтда ушбу ҳакамлар яна хатога йўл қўймайди деб ким жавоб беради?

Айни дам Суперлига турнир жадвалида кучли учликни банд қилиб турган жамоалар – “Насаф”, “Пахтакор” ва “Навбаҳор”ни кейинги турларда бир қанча муҳим баҳслар кутиб турибди:

“Пахтакор” – “Насаф”
“Бунёдкор” – “Навбаҳор”
“Насаф” – “Сўғдиёна”
“Қизилқум” – “Насаф”
“Пахтакор” – “Сўғдиёна”
“Пахтакор” – “Қизилқум”
“Бунёдкор” – “Пахтакор”

Бу каби марказий баҳсларда йўл қўйилган ҳар бир хато чемпионлик учун кураш олиб бораётган жамоанинг ўйинига салбий таъсир ўтказиши мумкин. 

Айтайлик, “Пахтакор” – “Насаф” баҳсида ҳакам тошкентликлар фойдасига қарор чиқарса, у ҳолда Бердиев жамоасининг ўйинига катта таъсир ўтказади ва ҳатто чемпионлик учун курашни тарк этишига ҳам сабаб бўлади. Ёки аксинча бўлсачи? “Пахтакор” ҳакамнинг нотўғри қарори қурбони бўладими?

Ўзбекистон футбол ҳакамлари маркази ва ЎзПФЛга мурожаат!

Агар  Ўзбекистон Суперлигасидаги ўйинларнинг янада қизиқарлилиги ошириш ва мухлисларни яна стадионга қайтаришни истасангиз, бу каби хатоларга йўл қўйган ҳакамларга янада жиддий чора кўриш керак.

Хусусан, ҳозирда чемпионлик учун даъвогар бўлиб турган “Насаф”, “Пахтакор” ва “Навбаҳор” иштирокидаги МАРКАЗИЙ учрашувларга чет элдан тажрибали ҳакамлар тайинланиши керак эканлигини таклиф қиламиз. Боиси, ҳар бир турда ҳакамлик борасида хатолар бўлмоқдами, у ҳолда камчиликлар кейинчалик ҳам кузатилаверади. Йўл қўйилган хато эса ҳар қандай муносиб жамоани чемпионликдан мосуво қилиши мумкин.

Булар бизнинг субъектив фикрларимиз. Хулоса эса ўзингиздан.

Жамшидбек Маҳмудов