"Қизилқум" мураббийи: "Ёшларга ишонч билдирмасак захирада ўтираверадилар"

“Андижон” – “Қизилқум” (1:1) жамоалари ўртасидаги учрашувдан кейин ташкил қилинган матбуот анжуманининг илк қисмида меҳмонларнинг вақтинча бош мураббийи Акмал Рустамов қатнашди.

- Ўтган турдаги учрашувдан кейин биз учун тайёргарлигимизга вақтимиз кам эди. Шунга қарамай, уч кун олдин Андижонга келиб тайёргарлик олиб бордик. Йигитларга Андижон ҳавоси, иқлимига мослашишига шароит яратдик. “Андижон” Ўзбекистондаги яхши жамоалардан бири. Айниқса, ўз уйида мухлислари олдида яхши футбол намойиш қилади. Биз буни билардик. Ишқибозлари 12-ўйинчиси. Шунга қарамай, футболчиларимга раҳмат айтаман. Ўтган ўйинда тактикамизда бироз ўзгариш қилдик. Айрим хатолар бор, бунинг устида ишлашимиз керак. Ўз жамоамни қўлга киритган бир очко билан табрикламоқчиман. Йигитлар ўйинга қўйилган кўрсатмаларни 100 фоиз бажаришгани учун миннатдорман. Навоийдан келиб бизни қўллаб-қувватлаган мухлисларимизга катта раҳмат.

- “Қизилқум” жамоаси бешта ҳимоячи билан ўйнади. Бу сизни тактикангизмиди?

- Худди шундай. Никола Лазаревич ишлаган пайтда 4-1-4-1 схемасида ўйнаётгандик. Биласизлар, ҳозирда 4-5 та йўқотишларимиз мавжуд. Олдинга учрашувда Шахзод Раҳматуллаев ҳам жароҳат олди. Шунга қарамасдан ўтган турда тактик схемани ўзгартиришга мажбур бўлгандик. Футболчиларга ҳам бу тактик схема ёқяпти. Ўйин пайтида бу 2-3 та схемага айланади. Ҳужумга чиққан пайтимизда 2-3 та ҳужумчи бўлади. Орқага ўтган пайтимизда 5 та ҳимоячи схемасига ўтамиз. “Сўғдиёна” билан баҳсда буни синаб кўрдик. Ушбу тактика устида яна ишлаймиз. Худо хоҳласа, натижа бўлади.

- Захирадан майдонга тушган футболчилар ўйинни қанчалик кучайтира олдилар?

- Яна қайтараман, 5-6 та йўқотишимиз бор. Ёшларга ишонч билдиряпмиз ва бу йўлда давом этамиз. Навоийнинг академиясидан, мактабидан чиққан болаларимиз бор. Уларга ишонамиз ва мослашиб кетишлари учун вақт керак. Ёшларга ишонч билдирмасак захирада ўтираверадилар. Ишонч билдириб, неча дақиқа бўлса ҳам ҳар учрашувда майдонга туширсак мослашиб кетишига ишончим комил.