"Қизилқум" сафардаги ўйинларда "Сурхон"ни ютолмаяпти. Бу сафарчи?

22 сентябрь куни “Сурхон” – “Қизилқум” ўртасидаги учрашув орқали Суперлиганинг 19-турига старт берилади.

Тошкентда “Пахтакор” марказий стадионида ўтказиладиган ушбу қарама-қаршилик хусусида тўхталадиган бўлсак, бу икки жамоалар ҳозирга қадар чемпионат доирасида 19 маротаба тўқнашишди. Шуларнинг 9 тасида “Сурхон”нинг ҳисобида ғалаба бор. “Қизилқум”да эса 5 та ғалаба ва яна 5 та учрашув дуранг билан тугаган. Тўплар нисбати 21\16 “Сурхон” фойдасига.

Биринчи даврада Навоийда бўлиб ўтган баҳсда дарвозалар дахлсиз қолган. Қизиқ жиҳати шундаки, “Қизилқум” ҳали “Сурхон” мезбонлигидаги ўйинларда ғалаба қозона олмаган. Фақатгина термизликларга қарши сафардаги учрашувларда 2 марта дуранг ўйнаган холос. Қизиқ, ғалабага жуда ташна бўлиб турган "Қизилқум" бу сафар қандай натижа кўрсатаркин? Буни 22 сентябрь куни 18:30 да бошланадиган беллашувда билиб оламиз.

Эслатиб ўтамиз, “Сурхон” турнир жадвалида 27 очко билан 6-ўринда бўлса, “Қизилқум” 11 очко жамғариб турнир жадвалида сўнгги – 14-поғонани банд этиб турибди.