"Қизилқум"да чемпион футболчилар йиғилган, аввал ўзимизни кўрсатиб қўяйлик, кейин гапирамиз" - Олег Зотеев айрим гап-сўзларга муносабат билдирди

Навоийнинг “Қизилқум” клуби дастлабки тўртта турдан кейин 10 очко жамғариб, “Пахтакор” билан бирга турнир жадвалини бошқариб келмоқда. Клуб таркиби қандай футболчилар билан тўлдирилганини яхши биласиз. Айниқса, Олег Зотеевдек маҳоратли ўйинчининг “Қизилқум”га ўтгани жамоани нуфузини ошишига ҳам, жамоа ўйини кучайишига ҳам туртки бермоқда.

“Қизилқум”даги дастлабки таассуротлари

- Тўғрисини айтсам, бештадан бешта ўйинда ютамиз, деб аниқ айта оладиган футболчи йўқ. Нимага деганда, чемпионат олдидан сизга айтгандим, ҳамма жамоа деярли бир хил. Кўриб турибсиз, “Металлург” “Насаф” майдонидан дуранг ўйнаб келди. “Бунёдкор” “Сўғдиёна” билан 0:0 ўйнади. “Пахтакор” “Олимпик”ка қарши учрашувда очко йўқотди. Ўзингиз ҳам билсангиз керак, Ўзбекистон чемпионатида 5-6  тур давомида ҳамма клуб битта даражада бўлади. Ўша ўйинларда ким камроқ очко йўқотса, ўша жамоаларда ташаббус пайдо бўлади. Биз мавсумга тайёргарлик кўриш чоғида деярли барча ўйинларни ютқазганмиз. Кўпчилик “Қизилқум” энди ўйнай олмайди, ўйинчиларни қариб қолган, деган гапларни айтишди. Аммо ортда қолган учрашувлар кўрсатдики, “Қизилқум” футболчилари ҳали кураша олади. Чемпионат бошланишига икки кун қолганда мураббийлар ва футболчилар иштирокида ўзимиз йиғилиш ўтказдик. Дастлабки бешта тур энг асосийлари эканини ва ушбу баҳсларда кўпроқ очколарни тўплашимиз кераклиги бўйича келишиб олгандик. Бир-биримизга ёрдам бериб, қўллаб-қувватлаб ўйнаяпмиз. Ҳеч ким кутмаган десак ҳам бўлади.

Бош мураббий Никола Лазаревич хусусида

- Очиғини айтганда, ҳали бир-биримизга мослашиш ва кўникиш учун вақт керак. У Ўзбекистонда энди ишлаяпти ва янги мураббий. Биз ушбу мураббийни тушунган ҳолда ёрдам беришга ҳаракат қиляпмиз. Биздан ҳам кўп нарсаларни сўрайди. Масалан, бу қанақа жамоа, нималарга қодир, деган мазмунда. Чунки боя айтганимдек, Ўзбекистонда илк бор ишлаяпти. Шу тариқа, бир-биримизга ёрдам бериб ишлаяпмиз. Ҳозирдан яхши ёки ёмон мураббий, деб айта олмайман. Балки биринчи даврадан кейин қандайдир хулоса чиқариш мумкин бўлар. Агар кучли учталикда юрсак, демак ҳаммаси жойида эканини билдиради. Мабодо, пастки ўринларда юрадиган бўлсак, демак у ёки биз тўғри келмаган бўламиз. Ҳаммасини вақт кўрсатади.

Жамоа қайси ўринга даъвогар?

- Қайси ўрин учун курашишимизни 100 фоиз аниқ айтолмайман. Илгари йиғилиш ўтказилган маҳалда ҳам раҳбарларимиз бу хусусда кейинроқ гаплашамиз, дейишган. Ўзбекистон Кубогида ҳақида эса ҳали гап ҳам бўлмаган. Чемпионатда қанча кўп ютсак, бизга шунча яхши, дейишган. Мана, ғалабаларни бошладик.

Чемпионат савияси қандай?

- Дастлабки 4 та турда нима кутган бўлсам, шулар бўлди. Яна 4 та турдан кейин аниқ гап айта олишим мумкин. Нимагаки, деярли барча клублар тактик ва жисмоний тарафдан яхши ҳолатга келиб қолишди. Ҳали клублар 100 фоиз тўлиқ имкониятини ишга солмаган. Масалан, “Насаф” Суперкубокда бошқача ўйин кўрсатган, Осиё Чемпионлар лигасида эса яна бошқача ўйнаяпти. Демак, улар энди ўзига келяпти. ОЧЛдан кейин Ўзбекистон чемпионатида ўйнаш жуда осон. Ахир бизнинг чемпионатга қараганда, чемпионлар лигаси кучлироқ. Ҳар доим ОЧЛдан сўнг ўзимизни чемпионатда тўп суриш осонроқ кечган. Шу сабабли яна бир нечта турдан кейин биринчилигимиз савияси ҳақида аниқ фикр билдиришим мумкин.

Кубокда жамоа олдига вазифа қўйилмагани илк мағлубиятга таъсир қилдими?

- Кубок доирасида “Навбаҳор”га ютқазганимизни 100 фоиз таъсири йўқ. “Қизилқум”да йиғилган футболчилар ҳеч қачон пастки ўринларда юрмаган, фақат чемпионлик учун курашган. Гарчи бизга ҳеч нима айтишмаган бўлса ҳам, доим ғалаба учун курашамиз. Таркиб деярли 80 фоизга “Локомотив”да тўп сурган футболчилардан ташкил топган. Ўртоқлик ўйини бўладими, чемпионатми фарқи йўқ, ҳар бир баҳс биз учун муҳим.

“Қизилқум” 2-даврада пастга қулайдими?

- Билсангиз, ҳар доим футболда қандайдир гаплар юради. Яқинда “Барселона” “Реал”ни 4:0 ҳисобида ютганидан кейин одамлар орасида “ие, бу қанақаси, “Реал” ёрдам бердимикин”, деган гап-сўзлар чиқяпти. Бундай гаплар ҳар доим бўлади. Яна қайтараман: “Қизилқум”да чемпион футболчилар йиғилган. Бундай ўйинчилар майдонга шунчаки тушмайди. Доим натижа кўрсатишга ўрганиб қолганмиз. “Қизилқум” иккинчи даврада ўйинни ташлаб юборади, деган гап-сўзлар бизга ҳам етиб келган. Бу қуруқ гап. Биринчи даврадан кейин ҳаммаси кўринади. Бу борада ҳозир кўп гапирсак бўлади, аммо аввал ўзимизни кўрсатиб қўяйлик, кейин гапирамиз.