Coca Cola Суперлигаси 18-тур доирасидаги "Қизилқум" - "Қўқон-1912" учрашувидан кейинги матбуот анжуманининг биринчи қисмида меҳмонлар устози Бахтиёр Ашурматов иштирок этди. Бу ҳақда клуб матбуот хизмати хабар берди. 

- Гапнинг очиғи, ўйиндан кейин аниқ фикр билдириш қийин. Футболчилар борларини бериб ўйнади. Афсуски, футбол бешавқат ўйин. 15 дақиқада иккита гол ўтказиб юбордик ва мағлубиятга учрадик. “Қизилқум”га омад кулиб боқди. Ғалаба билан навоийликларни табриклайман. Шогирдларим мағлубиятга учраган бўлсак-да, борларини бериб ўйнаганликлари учун эътироз билдира олмайман. Майда хатолар қимматга тушди. Охирги ўйинларда стандарт вазиятлардан гол ўтказиб юборяпмиз. “Бухоро” билан баҳсда ҳам шундай бўлганди. Балки бироз химояланиш услубимизни ўзгартиришимиз керакдир. Бирга-бир эмас, зонали ҳимояга ўтишимиз лозимдир.

Ҳисоб 1:1 бўлиб турган вазиятда бизда яхши имконият бўлди. Сардор Азимов қулай вазиятдан фойдалана олмади. Омад юз угирди. “Қизилқум” эса кейинги хужумдан самарали фойдаланиб, зафар қучди. Ўйиннинг охирида уч ҳимоячи билан ўйнадик ва катта куч билан ҳужумга ўтгандик. Таваккал қилгандик. Бироқ бу ўзгаришлар самара келтирмади. Биз жуда ҳам оғир мағлубиятга учрадик. Негаки, ҳозир биз шунақанги вазиятда эдикки, ёки юқори ўринлардан бирига чиқишимиз ёки жойимизда қолишимиз мумкин эди. Йўқотилган уч очко имкониятларимизни пасайтириб юборди. Юқори ўринларни кўзласак, бундай баҳсларда ғалаба қозонишимиз шарт. Тўғри, ҳали олдинда ўйинлар бор. Лекин жуда қимматли очколарни бугун бой бердик.

Якуба Бамба учрашувга ёмон киришиб кетмади. Ўйинни кучайтирди. Райевац борасида шуни айтишим мумкинки, меҳмонда тўп тепганимиз туфайли битта ҳужумчи Норбеков билан ўйинни бошладик. Норбеков легионер ҳужумчимиз Райевацдан кўра тезкор ва шунинг учун уни асосий таркибда майдонга туширдик, - деди қўқонликлар бош мураббийи.

Матнда хатолик топсангиз, ўша хатони белгилаб, бизга жўнатинг (Ctrl + Enter)