"Қизилқум"нинг янги бош мураббийи: "Ҳар бир очко биз учун олтинга тенг"

Чемпионатни омадсиз ўтказаётган “Қизилқум”га биринчи давра тугамасидан учинчи марта янги бош мураббий тайинланди. Аввалига, Асрор Алиқулов, кейин Тачмурод Агамуродов ва энди Жамшид Саидов!

Яқинда Саидов навоийликларнинг бош мураббийи сифаида расман таништирилди. У Агамуродов билан бирга ишлайди. Бунгача ҳам иккала мутахассис бир қатор клубларда тандем сифатида иш олиб боришган. Энди уларнинг йўллари “Қизилқум”да кесишди.

Sports.uz журналисти “Қизилқум”нинг янги бош мураббийи этиб тайинланган Жамшид Саидовдан интервью олди.

- “Қизилқум” жамоасига бош мураббий этиб тайинланганингиз билан табриклаймиз. Ҳаммаси қандай юз берди?

- Афсуски, жамоанинг натижалари омадсиз бўлаётганди. Кейин Тачмурод Агамуродовни таклиф қилдилар. Унгача Асрор Алиқуловга маслаҳатчи эди, сўнг бош мураббий бўлди. Албатта, менга таклиф бўлишини кутмагандим. Бир ой олдин Тачмурод Шамакович “Қизилқум”га бош мураббий бўлганди. Ҳамма билади, у менинг устозим, худди отамдек бўлиб қолган. Жамоага келиб, бирга ишлайлик деди. Кейин раҳбарлар билан учрашдик ва бир тўхтамга келдик.

- Вақт тиғиз, олдинда чемпионат ўйини турибди. Янги клубдаги ишни нимадан бошладингиз?

- Биринчи навбатда коллектив қилиш керак. Албатта, йигитларга тактик услубларни ўргатиш лозим. Барибир аввало жамоавий ўйинни йўлга қўйишимиз муҳим. Бунга ҳаракат қиламиз. Тўғри, вақт кам. Лекин курашамиз. Биринчи давра тугашига иккита тур қолди ва максимал даражада ҳаракат қиламиз.

- Олдингизга қўйилган вазифа қандай?

- Вазифа – “Қизилқум”ни Суперлигада сақлаб қолиш. Ўзингиз кўриб турибсиз, жамоа чемпионатда 13-ўринда. Бунинг устига Суперлигадаги рақобатчимиз билан ўйнаймиз.

- Бош мураббий сифатида “Қизилқум”ни қийин вазиятдан олиб чиқиб кетиш учун режаларингиз қандай?

- Бор кучимиз билан ҳаракат қиламиз. Ҳаммасини вақт кўрсатади. Агар ишонч бўлмаганида бу ерга келмасдан “Локомотив”да ишлаб юраверардим. У ерда ишларимиз яхши, жамоа про лигада 1-ўринда кетяпти.

- “Локомотив”ни тарк этиш қийин кечмадими?

- Йўқ, жамоа бош директор ўринбосари Тўлабек Акрамов футболни яхши тушунади. Шундай таклиф бўлганида менга омад тилади, қўллаб-қувватлаймиз деди. Улар дуо қилишади ва мен яхши ниятлар билан кетдим. Дўстона хайрлашдик. Клубдаги барча яхши тилаклар билдиришди.

- Олдинда турган “Турон” билан учрашув сизга ҳам, “Қизилқум”га ҳам жуда муҳим. Ҳар қандай мутахассисга дебютини ғалаба билан бошлаш жуда керакли ҳисобланади. Бу ўйин олдидан нима деган бўлардингиз?

- Олдиндан нимадир айтиб бўлмайди. Биз максимал ҳаракат қиламиз. Клубда эндигина иш бошладим. Ҳар бир учрашувда максимал ғалаба учун курашамиз, бундан бошқа иложимиз ҳам йўқ. Шундай қилмасак бўлмайди. Биз учун ҳар бир очко олтинга тенг. Навоий халқи, мухлислар, раҳбарлар – умид қилишяпти. Навоийда албатта футбол бўлиши керак. Шу ўринда “Қизилқум” раҳбариятига менга ишонч билдиришгани учун миннатдорчилик билдирмоқчиман. Табиийки, менга билдирилган ишончни оқлашга ҳаракат қиламан.

Шуҳратбек Жўраев.