Қизиқ, ютган биз-у, мақсадига эришган рақиб жамоа бўлди-я?!

Аввало, ўзбекистонлик мухлисларни ғалаба билан табриклаймиз. Терма жамоамиз “Осиё Кубоги-2023” саралаш баҳсларининг илк турини ўтказди ва учта гол урди. Рақибда эса дарвозамизга жавоб голини уриш учун куч ҳам, хоҳиш ҳам йўқ эди. Ҳа, бу шунақа ўйин бўлди. Рақиб Шри-Ланка эди-да. Ўзбекистоннинг ғалабасига шубҳа бўлгани йўқ, фақат учрашувдан олдин нечта гол уриши борасида қизиқарли баҳс-мунозаралар бўлди ва ҳамма йирик ҳисобда ютишимизни истади, бунга ҳақлимиз.

Балки 3:0 дан қониқмаганлар кўпроқ бўлгандир-а? Терма жамоамизда иш бошлаган Сречко Катанец илк бор расмий баҳсда қатнашди. У ўйиндан олдинги матбуот анжуманида рақиблар ҳақида гапирар экан, қуйидаги сўзларни айтганди: “Концентрацияни сақлашимиз лозим. Чунки мен биламан журналист ёзаётган нарсаларни футболчилар ўқийди. Агар 100 фоиз тайёр бўлмасак, худди сиз айтгандек, Шри-Ланкадан ва Мальдив ороллари терма жамоасидан сюрприз бўлиши мумкин. Шундай нарсалардан қўрқаман. Ҳамма футбол ўйнашни ўрганиб олган. Япония ва бошқа терма жамоалар Осиё Кубогига йўлланма олиб бўлган. Биз энди майдонга чиқамиз”.

шри3

Катанец рақиблар кучсиз бўлса-да¸ уларга ҳурмат билан қараяпти ва эҳтиётсизлик ёмон оқибатларга олиб келишини яхши билган ҳолда футболчиларини доим сергакликда ушлаб турибди. Хуллас, Шри-Ланка билан ўйин ҳам ўтди. Жамоамиз учта гол эвазига ютиб, уч очкони қўлга киритди. Яхши ўйин бўлди, аммо бошқаларга ёқмаган бўлиши ҳам мумкин. Чунки юқорида бежизга тўхталмадик, яъни кўпроқ гол уришимизни исташганди. Бунинг устига голлардан иккитасининг стандарт вазиятдан киритилгани, ўйиндан комбинациялар орқали гол урилмагани бўйича ҳам танқидларни эшитяпмиз. Агар Хитой, Кувайт, Ироқ ёки БАА каби термаларни шу ҳисобда ютсак, бундай гап-сўзлар бўлмасди ва қандай гол киритилгани ҳам ортиқча муҳокама қилинмасди. Бу ерда гап рақибнинг Шри-Ланка эканида. Аммо стандартдан урган голларимиз футболчиларимизнинг маҳорати, уларнинг ижроси билан боғлиқ бўлди. Тан олайлик, барибир Жалолиддин Машарипов ҳам, Достон Ҳамдамов ҳам стандарт вазиятни ўзига хос нозик дид билан амалга оширишди. Бу ҳам бир санъат, аслида.

шри1

Ўйинда яққол кўринди, рақиб жамоанинг мақсади иложи борича ўз дарвозасидан камроқ гол ўтказиш эди. Ўйинни чуқур ҳимоядан бошлаб, чуқур ҳимоя билан якунлашди. Вакилларимиз дастлабки голни уриб олишгунича бироз асабийлашишди. Чунки кўплаб вазиятлар, ҳужумлар ташкил этилаётганди. Аммо дарвозабон уларнинг энг яхши ўйинчиси бўлди. Балки биринчи голни уриб олгач, рақиб “очилиб” кетади ва шунда бизга янада осонроқ бўлади, деб ҳам ўйладик. Лекин Машариповнинг голидан кейин ҳам шри-ланкаликлар ҳимоядан чиқмади ва бу ҳолат то ўйин охиригача - 3:0 дан ҳам кейин ҳам давом этди. Қизиқ, ютган биз-у, аммо мақсадига эришган рақиб жамоа бўлди-я?! Ҳисобнинг ўта йириклашиб кетишидан қўрқишгани боис ҳам ҳимояда каттагина “автобус”ни қўйиб олишди. Аммо, барибир дарвозабони яхши таассурот қолдирди. У ҳам ўйин чўзишга уринганига қарамай, жуда кўплаб вазиятларда жамоасини муқаррар голлардан сақлади.

Бош мураббий Элдор Шомуродовга охиригача имконият берди. Қолаверса, у сардоримиз. Гол уришини ҳаммамиз кутдик, ўзи ҳам жуда хоҳлади. Балки шунинг учун учрашув мобайнида асабийлашиб юрди. Бунга рақиб футболчиларининг майдонга ётиб олаверишлари ҳам сабаб бўлди. Бунинг устига имкониятлардан фойдаланишда омади келмади, бу сафар. Азизбек Амонов эса Эрондаги тўп сураётганидан бери ўйини анча “очилибди”. Унда креативлик кўпроқ кўзга ташланди. Ностандарт ҳаракатлар, кутилмаган зарбалар, дриблинг, умуман олганда, биз ушбу футболчи мисолида яна бир тажрибага эга бўляпмиз.

шри

Майли, Ўзбекистон 3:0 ҳисобида бўлса ҳам йирик натижага эришди. Гуруҳимизда Мальдив билан Таиланд борлигини биласиз. Дастлабки турда Таиланд ҳам рақибини 3:0 ҳисобида енгди. Лекин биз гуруҳдан чиқамиз, хавотирга ўрин йўқ. Буни муҳокама қилишнинг ўзи кулгули. Катанец мана шундай расмий учрашувлар орқали ўзининг фалсафасини янада шакллантиради. Бунгача норасмий турнирлар ва ўртоқлик беллашувлари орқали йигитларни кўздан кечирганди. Барибир расмий ва оддий учрашувнинг фарқи бор. Намангандаги ўйинлар бизнинг фойдамизга хизмат қилади, айниқса Катанецга!  

Фикрлар

Фикр қолдириш учун авторизациядан ўтинг!
Gulomqodir Askhanov
09/06/2022 09:55
Йигитлар футбол учун каттик хам рухан хам жисмонан мехнат килишди