"Қизиқишлар бўлгандир, аммо мен эшитмадим" ёхуд "Сўғдиёна" футболчиси гуруҳда жиддий қийинчиликларга дуч келишмагани ва Бақоев қандай руҳлантиргани ҳақида

Жиззахнинг “Сўғдиёна” клуби ОФК Кубоги гуруҳ босқичини муваффақиятли ўтказиб, учта учрашувда 100 фоизли натижани қайд эта олди. Лекин ҳар бир ўйинда рақиблар вакилларимизга жиддий қаршилик кўрсатишди. Гуруҳда аввалига “Нефтчи”ни 2:0, ЦСКАни 3:2 ва охирги турда жиззахликлар Туркманистоннинг “Олтин Аср” жамоасини 3:1 ҳисобида мағлуб этди. Бу ўйин ҳам “Сўғдиёна” учун жуда муҳим эди. Барча учрашувда Улуғбек Бақоев жамоаси гол уриш борасидаги самарадорлигини кўрсата олди. Энди жамоамизни олдинда Тожикистоннинг “Хўжанд” клубига қарши Марказий минтақа ҳудудий финал учрашуви кутяпти.   

Жасур Ҳасанов бошчилигидаги жамоа рақибларидан кучли эканлигини амалда намойиш эта олди. Туркманларга қарши беллашувда “Сўғдиёна”нинг иқтидорли ўйинчиси Жавоҳир Қаҳрамонов гол урди ва қолган голларда ҳам фаол қатнашди. Ушбу ўйинчи аввало “Олтин Аср”га қарши учрашув борасидаги фикрлари билан ўртоқлашди.

- Ўйинга келсак, бизни бутун Ўзбекистон қўллаб-қувватлаб турганини билардик. Мухлисларимизга фақат ғалаба керак эди. Буни яхши ҳис қилиб тургандик. Барчаси биз учун яхши бўлди. Ажойиб ўйин кўрсатиб, ғалаба қозондик. Ушбу ўйин ишқибозларимизга ҳам ёқди, деб ўйлайман.

- Гуруҳдаги қайси ўйин энг қийини бўлди, деб ўйлайсиз?

- Менимча, гуруҳдаги ҳеч бир учрашувда жиддий қийинчиликларга дуч келмадик, деб ўйлайман. Бизга ғалаба қозониш вазифаси қўйилганди ва барча баҳсларда буни уддаладик.

- “Сўғдиёна” ОФК Кубогида олдига қўйилган вазифани босқичма-босқич бажаришга киришди...

- Ҳа, тўғри. Бизнинг олдимизга ҳар бир учрашувда фақат ғалаба қозониш вазифаси қўйилган.

- Чемпионатда ҳам “Сўғдиёна”нинг натижалари яхши. Пешқадамлардан бири бўлиб турибди. Лекин барқарорликни сақлаш ҳам осон эмас. Сизнингча, жамоа янада кучайиши керакми?

- Ҳозир ҳаммаси яхши кетяпти. Тўғри, олдимизда яна ўйинлар кўп. Ишлашда давом этамиз. Насиб бўлса, барчаси биз учун яхши бўлади.

- ОФК Кубогида илк бор қатнашяпсизлар. Бошида ҳаяжонни босиб ўтиш қийин кечмадими?

- Ҳа, биринчи учрашувда бироз ҳаяжон бўлди. Кейинги учрашувларда барчаси жойига тушди.

- Шунингдек, сиз учун ҳам бу халқаро майдондаги илк мусобақа эди. Гуруҳда Марказий Осиё клублари жой олганлигини инобатга олсак, ўзимизни чемпионатдаги учрашувлардан фарқли томонлари сезилдими ёки...

- Тўғри айтасиз, мен учун ҳам ОФК Кубогида тўп суриш биринчиси бўлди. Ўйлашимча, ҳаммаси яхши. У қадар қийинчилик сезилмади.

- Улуғбек Бақоев ўйинлар мобайнида сизларни қандай руҳлантирди?

- Бизни бутун Ўзбекистон кўраётганини, энг яхши ўйинимизни кўрсатиб ютишимиз кераклигини ва Ўзбекистон учун ўйнаётганимизни айтиб, бизни руҳлантирди.

- Жавоҳир, эшитишимча, хизматингизга қизиқиш билдираётганлар бор экан, айниқса хориждан. Шу ростми?

- Тўғриси, бундан хабарим йўқ. Энди сиздан эшитяпман. Балки қизиқишлар бўлгандир, аммо мен эшитмадим.