"Қўқон-1912" ҳужумчисининг шартномаси узайтирилди

"Қўқон-1912" жамоасини Суперлигага олиб чиқишда катта ҳиссасини қўшган ҳужумчи Шахзод Бешимов яқин икки йил яна қўқонликлар сафида қолади. Ҳужумчи билан 2026 йилнинг охирига қадар мўлжалланган шартнома имзоланди. Бу ҳақида клуб матбуот хизмати маълум қилди.

Шу муносабати билан клуб матбуот хизмати Шахзод Бешимовдан қисқа интервью олди.

«Мавсум яхши ўтди деб ўйлайман. Олдимизга қўйган вазифани бажардик. Суперлига йўлланмасини қўлга киритдик.

Мавсум якунланганидан сўнг жамоа  раҳбарияти ва мураббийлари билан учрашдим. Улар мени кейинги мавсумда ҳам жамоада кўришаётганини ва "Қўқон-1912"га керак эканлигимни айтишди. Улар менга катта ишонч билдиришди. Суперлигада кўплаб голлар уриб, жамоамга фойда келтиришга ҳаракат қиламан. Яхши натижалар билан мухлисларни хурсанд қилмоқчиман. Кейинги йил ўз олдимга Суперлига тўпурарларидан бири бўлишни режа қилганман.

Умид қиламанки, кейинги мавсумда ажойиб ўйинлар билан мухлисларни янада хурсанд қиламан, - деб фикрини якунлади маҳоратли ҳужумчи.