"Қўқон-1912" нега франциялик футболчиси билан шартномани бекор қилди?

Барчангизга маълумки "Қўқон-1912" футбол клуби яқинда Франциянинг "Нант" жамоаси тарбияланувчиси бўлган футболчи билан шартнома имзолаган эди. Оливье Боннес билан тузилган шартнома кеча ҳар икки томоннинг келишувига асосан бекор қилинди. Бунга сабаб футболчининг оилавий шароитларидан келиб чиқиб, ватанига қайтиши лозимлиги бўлди. Бу ҳақда клуб матбуот хизмати хабар бермоқда.

Оливье Боннес Ўзбекистонга келишидан бир неча кун олдин унинг отаси вафот этган эди. Бу ҳолат футболчининг руҳий ҳолатига қаттиқ таъсир қилган. Боннес шундай оғир кунда онасини ёлғиз қолдириб келганлигидан афсусда бўлди. Мусулмон оила фарзанди бўлган футболчи оиласига қайтиш истагини билдирди.

"Қўқон-1912" футбол клуби мураббийлар штаби футболчиларнинг инсонийлик факторларини биринчи ўринга қўяди. Жамоа раҳбарияти Франциялик футболчини тўғри тушунган ҳолда ўртадаги шартномани бекор қилди. Оливье Боннес бугун эрта тонгда Парижга учиб кетди.