"Қўқон-1912"нинг Тошкентдаги йиғинига Мурод Холмуҳаммедов, Қувондиқ Рўзиев ҳамда Александр Мерзляков қўшилди

“Қўқон-1912” жамоаси янги мавсумга тайёргарликнинг 2-босқичини бошлади. Бу ҳақда клуб матбуот хизмати хабар берди.

Бахтиёр Ашурматов шогирдлари бугун, 11 январь кунидан Тошкент шаҳрида йиғилиб машғулотларга киришди. Тошкентдаги машғулотларга жамоанинг барча асосий таркиб ўйинчилари ҳамда Қўқонда бўлиб ўтган дастлабки йиғинда ўзини яхши томонлама кўрсатган футболчилар таклиф қилинди. Пойтахт йиғинида жамоанинг асосий етакчилари Мурод Холмуҳаммедов, Қувондиқ Рўзиев ҳамда Александр Мерзляков ҳам сафга қўшилган.

Қўқонликлар бугун “Тўқимачи” стадионида шуғулланди. Тошкентдаги машғулотлар 20 январга қадар давом этиши кўзда тутилган. Мураббийларнинг режаларига кўра, мазкур йиғин давомида иккита назорат учрашуви ҳам ўтказилади. Назорат ўйинлари қайси жамоалар билан ва қачон ўтказилиши борасида кейинроқ хабар берилади.