Қосимов жамоаси учун "Турон" қулай рақибми ёки ноқулай?!

Бугунги кунга келиб ОКМК 39 очко билан мусобақа жадвалининг 4-поғонасида. “Турон” эса 16 очко билан 13-ўринда. Дарвоқе, бу “Турон” учун кўтарилиш. Боиси, ўтган турда Яйпанда “Сўғдиёна”ни 1:0 ҳисобида таслим қилгач, 14-ўриндан 13-ўринга чиқиб олди. Энди ОКМК ва “Турон” жамоалари Олмалиқда куч синашадилар.

Миржалол Қсимов жамоаси ўтган турда “Андижон” майдонида Хуршид Ғиёсовнинг пенальтидан урган голи эвазига қимматли уч очкони қўлга киритди. Бу ғалаба уларни омадсиз учрашувлардан кейин руҳлантирса керак.

“Турон”нинг вазиятидан хабардорсиз. Ёрқин Назаров устозлигидаги жамоа бор эътиборини Суперлигада қолишга қаратган. Ҳозирча уларда имконият бор. Бунинг учун қолган учала учрашувда ҳам ютиши талаб этилади. Бунинг учун “Сўғдиёна”га қарши омадли юришини ОКМК билан беллашувда ҳам давом эттириши лозим. Лекин ОКМК – бу жиддий рақиб. Гарчи медаллар учун курашда бироз ортга чекинган бўлса-да, Ўзбекистон Кубогини қўлга киритиш имкониятини қўлга киритган. Бунинг учун 12 ноябрь куни Қаршида “Насаф” билан беллашади. Унгача чемпионатдаги қўлга киритиладиган ғалабалар орқали янада яхшироқ руҳланган ҳолда тайёрланмоқчи (орада ОЧЛ ўйини ҳам бор).

Шубҳасиз, “Турон” билан бўладиган учрашувда ОКМКнинг имконияти юқорироқ. Ҳамма Миржалол Қосимов жамоасини фаворит сифатида кўрмоқда. Лекин жароҳат олган қатор етакчи футболчилари таркибга қайтишадими? Ҳозирча бу савол очиқ. Сиявуш Ҳақназари, Ислом Тўхтахўжаев, Анзур Исмоилов, Шохруҳ Гадоев, Сардор Мирзаев ва яна бошқа етакчилари жароҳат туфайли ОКМКга ёрдам бера олмаётганди. Агар улар сафга қайтишса ОКМК янада кучаяди. Аммо ушбу йўқотишлар сафига яна бир йўқотиш қўшилди. “Андижон” билан баҳсда ОКМКнинг марказий ҳимоячиси Сардор Раҳмонов сариқ карточка олди ва ушбу огоҳлантиришлари сони 4 тага етгани сабабидан ушбу ўйинчи навбатдаги турда жамоасига ёрдам бера олмайди. Бу ҳам Миржалол Қосимовга қўшимча муаммо туғдирмасдан қолмайди.

“Турон” клуби бу ўйинда имкони қадар очко қўлга киритиш ҳаракатида бўлади. Чунки улардаги вазиятни билиб турибсиз, лигада қолиш асосий вазифаси. Бироқ қаршисида ОКМКдеқ қоя турганида ёш “турон”чилар қандай қилиб ушбу қояни босиб ўтаркин? Ёрқин Назаров футболчиларини ғалаба сари илҳомлантираётганига ишонса бўлади. Зеро, “Турон” иккинчи даврада таркибини ёшартирди ва бу орқали ортиқча босимлардан қутулдилар. Ҳа, Суперлигада қолиш учун курашаётган жамоада ўзига яраша босим бўлиши табиий. Бироқ яйпанликлар таркибдаги салоҳиятдан келиб чиқиб, имконият даражасида қаршилик кўрсатишмоқда. Агар Суперлигани тарк этишса ҳам уларга ҳеч ким ортиқча эътироз билдирмайди.

Яна бир жиҳатни унутмаслик керак, ОКМКда ҳали ҳам совринли ўринларга кўтарилиш учун имконият бор. Бу борада улар буткул умидини узди, дейишга ҳаққимиз йўқ. “Турон”ни ютиб олса очколарини 42 тага етказиб олади. Албатта, рақибларининг натижаларига ҳам қаралади. Лекин “Турон” ҳам охиригача қаршилик кўрсатишини кутиш мумкин.

Ёдингизда бўлса, биринчи даврада Яйпанда бўлиб ўтган ўйинда томонлар 1:1 ҳисобидаги дурангга имзо чекишган. Умумий ҳисобда эса бу клублар Суперлигада 3 марта тўқнашишди. 2021 йилги биринчиликда ОКМК ўз уйида 2:0, сафарда 0:1 ҳисобларида ғалаба қозонган. Тўплар нисбати 4\1 табиийки, Қосимов жамоаси фойдасига.

ОКМК – “Турон” жамоаларининг 4-тўқнашуви ҳам қизиқарли ўтса ажаб эмас-а? 24-турни бошлаб берадиган бу учрашувда Назаров Қосимовга қандай сюрприз тақдим қиларкин?

Шуҳратбек Жўраев.