Қозоғистонда "Евро-2024"га йўл олиш имконияти борми?

Германияда бўлиб ўтадиган Европа чемпионатига саралаш ўйинлари ўз ниҳоясига етиб бормоқда. Саралаш доирасида "H" гуруҳидан ўрин олган Қозоғистон ажойиб юриши билан тўғридан-тўғри йўлланмани қўлга киритишига озгина қолди. Аммо энди улар Германияга бошқа йўлдан боришига тўғри келади. 

Қозоғистон 1-турда ҳам Словенияга мағлуб бўлганди. Аммо Данияга қарши учрашувда супер камбэк амалга ошириб, ўзига бўлган ишончни қайтарди. Сабаби, бу гуруҳда энг кучлиси Дания ҳисобланади. Кейинги турларда Сан-Марино ва Шимолий Ирландияни таслим қилиб, очколари сонини 9 тага етказиб олди. 5-турда эса Финляндияга ўз майдонида енгилди. Орада Шимолий Ирландиядан яна 3 очко олиб, Данияга мағлуб бўлди. Имконият йўқ эмасди, Финляндия ва Сан-Марино каби термалар устидан ғалаба қозонилгач, финалга тенг ўйин бўлган Словенияга қарши баҳсда таслим бўлди ва гуруҳда 4-ўринга тушиб кетди. 

Гарчи Қозоғистон гуруҳда 4-поғонада қолиб кетган бўлсада, қўшниларимизда имконият йўқ эмас. Гап шундаки, Еврода 24 та жамоа иштирок этади. Турнир Германияда бўлганлиги сабабли немислар тўғридан-тўғри чемпионат иштирокчисига айланади, қолган 23 та жамоа сараланади. 10 та гуруҳдан биринчи ва иккинчи ўринни олганлар Еврога йўл олади. Шунда 3 та жой бўш қолмоқда. Бу ўринни тўлдириш учун Миллатлар лигасига мурожаат қилинади. Мазкур турнирнинг "A", "B", "C" гуруҳларидаги биринчи ўринни эгаллаганлар орасида плей-офф ўйинлари ўтказилиб, 3 та жамоа Германияга боради, яъни 12 та давлат 4 тадан 3 та алоҳида йўлакка ажратилади. Қозоғистон ҳам улар орасида бор.

Плей-офф орқали "Евро-2024" учун курашиш ҳам осон кечмайди. Қозоғистон билан бирга бу йўлда Босния ва Герцеговина, Финляндия, Грузия, Греция, Исроил, Люксембург ва Польша каби жамоалар ҳам бор. Қолганлари кейинги учрашувларда маълум бўлади. Энг асосийси, улар орасига Уэльс ёки Хорватия қўшилади.