Қудратулло Абдуқаҳҳоров: "Эррол Спенс билан жанг қилишни хоҳлайман"

Хабарингиз бор, 28 сентябрь куни АҚШнинг Лос-Анджелес шаҳрида 66.7 кг вазн тоифасида IBF чемпиони Эррол Спенс  ҳамда WBC чемпионлик камари соҳиби Шон Портер ўртасида камарларни бирлаштирувчи жанг бўлиб ўтади. Бу жангнинг биз учун аҳамитяли жиҳати ушбу қарама-қаршиликнинг ғолиби, катта эҳтимол билан ҳамюртимиз Қудратулло Абдуқаҳҳоровдан ўз титулларини ҳимоя қилиш учун мажбурий жанг ўтказишга тўғри келади. Албатта, 18 октябрь куни Қудратулло АҚШлик Луис Коллазо устидан ғалаба қозона олса, ўйлаймизки юртдошимиз буни уддалай олади. Шунинг учун, бу жанг борасида ва тайёргарлик жараёнлари ҳақида боксчимизнинг фикрлари билан қизиқдик...

- Қудратулло 28 сентябрь куни эҳтимолий рақибларингиз Эррол Спенс ҳамда Шон Портер ўзаро жанг олиб боришади. Айтингчи, қай бирининг имконияти юқори?

- Ҳар иккиси ҳам ажойиб боксчилар. Барчасини ринг кўрсатади. Лекин Эррол Спенс анчагина кучли деб ўйлайман. Икки кун вақт қолди. Насиб қилса, ким ғолиб бўлишини тез орада билиб оламиз.

- Эрролни Портердан устуник жиҳати нимада?

- Бўйлари баланд, қўллари узун. Қолаверса, чапақай боксчи. Умуман жангларини кузатсангиз Спенс “класс” борасида бир бош баланд.

- Умуман олганда қай бири билан тўқнаш келишни хоҳлардингиз?

- Шубҳасиз, Эррол Спенс. Унда мағлубият йўқ. Аслида, юксак натижаларни қайд қилишни истар экансиз, бу йўлда ҳар қандай рақиб билан жанг қилишингизга тўғри келади.

- Навбатдаги рақибингиз, Луис Коллазони ўрганиш ишлари қандай кечмоқда?

- Мураббийим Илгар Алиев билан Youtube даги жангларини кўриб чиқмоқдамиз. Шунга қараб тайёргарлик олиб бораяпмиз.

- Жангга тайёргарлик босқичи фақат Ўзбекистонда бўлиб ўтиши режалаштирилганми?

- Тайёргарлик жараёнларини юртимизда якунламоқчимиз. Аслида, АҚШда олиб бормоқчи эдик. Лекин мураббийимнинг виза билан боғлиқ муаммолари пайдо бўлганлиги туфайли, қолиб кетдик. Илгар ака визасини кеча олди. Энди, жангдан бир ҳафта аввал океан ортига йўл оламиз.

- Машғулотлар жараёнида сизга спарринг рақиб бўлиб, кимлар ёрдам бермоқда?

- Достон Турдиев, Жамшид Нажмиддинов, Улуғбек Собиров ва Жасур Аҳмаджоновлар жуда катта кўмак беришяпти. Ўз ўрнида уларга миннатдорчилик билдириб қоламан.

- Коллазони бойларини кузатдик деяпсиз, шу кунгага қадар тушган рақибларингиз орасидаги қай бирининг жанг олиб бориш услубига ўхшаб кетар экан?

- 16 та жанг ўтказган бўлсам, булар орасида филиппинлик чарақай боксчи Адонис Кабалкуинто билан “World Boxing Council Asian Boxing Council Silver Welter Title”камари учун баҳс олиб борганман. Айнан шунга жанг олиб боиш услублари бироз ўхшаб кетади. Бироқ, барибир бошқа тоифадаги рақиб деб айта оламан.

Аҳмадбек ЭШМАТОВ суҳбатлашди.