Халқаро бокс федерацияси (IBF) профессионал бокснинг ярим ўрта (-66,68 кг) вазн етакчиси Қудратилло Абдуқаҳҳоров (17-0, 9 КО) ва учинчи ўринда бораётган Сергей Липинец (16-1, 12KO) ўртасида ушбу йўналишнинг вақтинчалик жаҳон чемпионлик камари учун жанг ўтказиш таклифини бериб, 5 кун вақт берган эди.

Ушбу жанг 22 февраль куни бўлиб ўтадиган Деонтей Уайлдер (41-0-1, 40 КО) ва Тайсон Фьюри (29-0-1, 20) ўртасидаги реванш жангинининг андеркардида бўлиб ўтиши ҳақида хабарлар тарқалди. Биз боксчимиз билан мазкур масала юзасидан боғланганимизда, “Top Rank” мутасаддилари айнан шундай ниятда эканлиги ва бунга ҳаракат қилаётганлигини тасдиқлади.

Лекин, бунинг амалга ошиши қийин бўлса керак... Сабаби, мазкур жанг кечаси бўйича заявкалар деярли тўлиб бўлганди. Томонларнинг ташкилий масалалари, музокараларга анча вақт кетишини инобатга олсак, бу санада юртдошимизнинг жанги бўлиши бироз эҳтимолдан йироқ. Аммо, “Top Rank” ҳам оддий компания эмас. Боб Арум ҳам анойилардан саналмайди. Қолаверса томонлар бир-бирларини сўзсиз тушуна олишса, балки бу амалга ошар. Воқеалар ривожини кузатиб боринг!