Рафаэл Леау агентлари Англияда учта клуб эшигини қоқди

Италиянинг “Милан” клуби қанот ҳужумчиси Рафаэл Леау Англия Премьер-лигасининг уч клубига таклиф қилинган бўлиб, улардан бири кутилмаганда “Лидс Юнайтед” бўлди.

Леау июнь ойида ўз фаолиятида “янги чақириқ”ни қабул қилиш истагини очиқ айтган эди. Шунингдек, у Премьер-лига клубидан таклиф олса, “жуда хурсанд бўлишини” ҳам таъкидлаган.

Рафаэлнинг Англияда ўйнаш истаги шу қадар кучлики, унинг манфаатларини ҳимоя қилаётган агентлик футболчини бир қатор инглиз клубларига мустақил равишда таклиф қилган.

Журналист Бен Жейкобс маълум қилишича, 27 ёшли Португалия терма жамоаси футболчиси “Манчестер Юнайтед”, “Арсенал” ва “Лидс Юнайтед”га таклиф этилган.

Бироқ Жейкобснинг таъкидлашича, трансфернинг қимматлиги сабабли Леаунинг Премьер-лигага кўчиб ўтиши ҳозирча эҳтимолдан йироқ. Айни пайтда унинг Туркияга йўл олиши эҳтимоли юқорироқ бўлиб, футболчига “Галатасарой” ва “Фенербаҳче” қизиқиш билдирмоқда.

Қанот ҳужумчиси ҳисобланишига қарамай, Леау ўтган мавсумнинг катта қисмини марказий ҳужумчи сифатида ўтказди. У “Милан” сафида 31 та учрашувда иштирок этиб, 9 та гол урди ва 3 та голли узатма муаллифи бўлди.