Рақиб тузалмагунича футбол ўйнамайсан! Бразилияда антиқа қарор чиқди

«Интернасьональ» клуби ҳимоячиси Виктор Габриэл Бразилия чемпионати доирасида 23 июль куни «Крузейро»га қарши ўйинда рақибини оғир жароҳатлагани учун узоқ муддатга майдондан четлатилди.

Қизиғи шундаки, футболчининг дисквалификацияси тўғридан-тўғри жабрланувчи – Габриэл Пекнинг тузалиш муддатига боғланган.

Пек оёғини синдириб олгани сабабли, бу жараён анча чўзилиши мумкин. Дастлабки тиббий хулосаларга кўра, унинг тўлиқ тикланиши уч-тўрт ой вақт талаб қилади. 

Шу боис Виктор Габриэл ҳам шу давр мобайнида футболдан четда қолади ва ўз ҳаракати оқибатлари ҳақида ўйлаб кўришга мажбур бўлади.