Рашид Ғофуров: "Бизда асосий ёки захира футболчиси деган гап йўқ"

Про-лиганинг 10-туридан ўрин олган “Навбаҳор-фарм” – “Андижон-SGS”(1:0) учрашувидан сўнг, фарм жамоа устози Рашиджон Ғофуров ОАВ ходимларининг саволларига жавоб берди. У одатдагидек, ўз сўзини ўйин ҳақидаги фикрлари билан бошлади.

- Ассалом алайкум! Гувоҳи бўлганинглардек, мазкур ўйин шиддатли тарзда кечди. Биз ушбу баҳсга жиддий тарзда тайёргарлик кўргандик. Боиси, бу про лигадаги ўзига хос “водий дербиси” ҳисобланади. Рақибга ҳурмат маъносида шуни таъкидламоқчиманки, “Андижон-SGS” футболчилари тўп билан яхши муомала қилишади. Шунинг учун про лиганинг турнир жадвали юқори поғоналаридан жой олиб турган бошқа жамоаларидан хавфсирамаган бўлсам ҳам андижонликлардан бироз хавфсирадим. Боиси, бугунги рақибимиз ўйинчилари тартибли ўйин намойиш этишади. Бугунги баҳс режамиз асосида кечди.     

 - Ҳимоячи Достонбек Абдулҳаевни жорий мавсумда илк марта асосий таркибда кўраётганимизга қарамай, у бугун майдондаги фаол футболчилардан бири бўлди. Абдулҳаев кейинги ўйинларда ҳам асосий аркибда майдонга тушадими?

- Жамоамиз таркибида 25 нафар футболчи бор ва уларнинг барчаси тенг кучга эга. Бизда асосий ёки захира футболчиси деган гап йўқ. Ўзинглар ҳам кўрдинглар, захирадан майдонга тушган футболчилар ўйинни кучайтириб, ғалабамизга муносиб ҳисса қўшишди.

Ўтган мавсумда захира ўриндиғи борасида бироз қийналгандик. аммо жорий мавсумда захира ўриндиғимиздан кўплаб маҳоратли футболчилар жой олишган. Масалан, кечаги машғулот пайтида Асилбек Орифжонов жароҳат олди. Жамоамизда унинг ўрнини боса оладиган ўйинчилар етарлича топилади. Жумладан, ҳимоячи Достонбек Абдулҳаев ҳам жароҳатидан тикланиш жараёнини олиб борганлиги боис, анча вақтгача майдонга туша олмади. Биз барча  футболчиларга доимо имконият берамиз.

- Бугунги ғалаба голига муаллифлик  қилган Иброҳим Ғанихоновнинг жароҳати бор эди. Уни захирадан майдонга тушираётганингизда катта таваккалга қўл урдингизми ёки у жароҳатидан фориғ бўлгандими?   

- Мазкур ўйинга тайёргарлик доирасида икки ҳафта давомида машғулотлар олиб бордик. Иброҳим Ғанихонов биринчи ҳафтада жароҳати борлиги боис, 5 кунча унга дам бердик ва Иброҳим якка тартибда машқлар олиб борди. Шунинг учун Ғанихоновни захирадан майдонга туширишга қарор қилдим. Иброҳимнинг қандай имкониятга эга эканлигини яхши билганим учун ярим ҳимоячи бўлишига қарамай, ҳужум чизиғида ўйнатишга қарор қилдим. Чунки шундай қулай вазият юзага келишини билардим. Ғанихонов ўша вазиятдан самарали тарзда фойдаланиб, гол уришга муваффақ бўлди.

Умуман олганда, захирадан майдонга тушган футболчилар ўйинга яхши киришиб кетиб, ишончни оқлашди.

- Давралар оралиғидаги ёзги трансферлар “ойнаси”да “Навбаҳор-фарм” таркибига янги футболчилар жалб этиладими?

- Албатта, имконият бўлса, таркибимизга янги ўйинчиларни таклиф этишга ҳаракат қиламиз. Лекин биз кўпроқ ўз эътиборимизни маҳаллий футболчиларга қаратяпмиз. Таркибимиздаги ёши каттароқ ўйинчиларга бошқа жамоалардан таклифлар бор. Уларнинг ўринларини боса оладиган иқтидорли футболчилар бўлса, уларни тарбиялаймиз, албатта.

“Навбаҳор” ПФК матбуот хизмати.