Расман! "Бунёдкор" собиқ мураббийи "Динамо" устозига айланди. Унинг олдига аниқ вазифа ҳам қўйилди (Фото)

Бугун, 11 июль куни «Динамо» жамоаси қароргоҳида йиғилиш ўтказилди. Унда Самарқанд вилояти жисмоний тарбия ва спорт бошқармаси бошлиғи Шуҳрат Рўзиев, клуб раҳбарияти ва жамоа футболчилари иштирок этишди. Бу ҳақда клуб матбуот хизмати хабар берди.

Тадбирда сўзга чиққан Шуҳрат Рўзиев «Динамо» жамоасининг бу йилги мақсад ва вазифалари ҳақида атрофлича сўз юритиб, жорий мавсумда вилоят раҳбарияти ва ҳомийлар томонидан клуб олдига энг аввало Суперлигага чиқиш вазифаси қўйилганлиги, шу мақсадда ўзбек футболида ўз ўрнига эга бўлган таниқли мутахассис Сергей Лушчан «Динамо» клуби бош мураббийи этиб тайинланганлигини эълон қилиб, Сергей Ивановични жамоага таништирди. Унга ёрдамчи мураббий сифатида Муҳитдин Ортиқов ёрдам беради.

Шундан сўнг, Сергей Лушчан сўзга чиқиб, билдирилган ишончга муносиб бўлиш ҳамда янги жамоанинг ривожи учун бор куч ва тажрибасини ишга солишини айтиб ўтди.

«Динамо» ПФК бош директори Учқун Қобилов ҳам сўзга чиқаркан, вилоят раҳбарияти ва клуб ҳомийлари ҳамда самарқандлик минглаб мухлислар ишончини оқлаш учун янги бош мураббий билан бирга жамоа равнақи ва Суперлигага чиқиши учун бор куч ва имкониятлар ишга солинишини таъкидлади.

Самарқанд вилоят ҳокими, вилоят футбол ассоциацияси президенти Эркинжон Турдимов ва клуб ҳомийлари томонидан Сергей Лушчан олдига «Динамо» клубини Суперлигага олиб чиқиш, самарқандлик ёш футболчиларни кашф этиб, катта футболга қадам қўйишга кўмаклашиш каби мақсад ва вазифалар қўйилганлиги маълум қилинди.

Самарқанднинг "Динамо" клуби 12 кун ишлаган мураббийни истеъфога чиқарди. Бунга нима сабаб бўлди?

Маълумотнома:

Сергей Иванович Лушчан

1973 йил, 9 апрель куни Тошкент шаҳрида туғилган.

Футболчилик фаолиятида тўп сурган клублари:

«Маъданчи» (Бекобод) (1992-93), «Океан» (Россия), «Крилья Советов» (Россия), «Ростсельмаш» (Россия), «Уралан» (Россия), «Металлург» (Россия), «Юнит» (Россия), «Бунёдкор» (Тошкент) (2007-2008).

1998-2003 йиллар Ўзбекистон миллий терма жамоаси аъзоси саналган.

Мураббийлик фаолияти:

«Бунёдкор» (ёшлар) – 2011-2013 йиллар.

Ўзбекистон ёшлар жамоаси U-19 – 2014.

«Бунёдкор» – 2014-2017 йиллар.

«Сўғдиёна» – 2018-2019 йиллар.

2020 йилнинг 11 июль кунидан «Динамо» бош мураббийи.

Мураббий сифатида ютуқлари:

«Бунёдкор» клуби билан Ўзбекистон чемпионати кумуш медали соҳиби (2016), кубок финалчиси (2017), Осиё чемпионлар лигаси иштирокчиси.