Расман! "Навбаҳор" "Пахтакор"нинг яна бир футболчиси билан шартнома имзолади

Янги мавсумда ўз олдига жиддий мақсадларни қўйган “Навбаҳор” таркибини кучайтиришда давом этмоқда. Бундан аввалроқ Sports.uz сайтига маълум бўлганидек, "Пахтакор" ярим ҳимоячиси Асад Собиржонов Туркия сафари олдидан наманганликлар билан шартнома имзолади. Бу ҳақда клуб матбуот хизмати хабар бермоқда.

Қирғизистоннинг “Олой” (Ош) жамоасига қарши кечган 3 февраль кунги халқаро ўртоқлик учрашувининг 2-бўлимида захирадан майдонга тушган мазкур футболчи 2000 йилнинг 3 августида Сирдарё вилоятининг Янгиер шаҳрида туғилган. Фаолияти давомида “Пахтакор – U-21” ёшлар (Тошкент, 2018 йил), “Бухоро” (Бухоро, 2019 йил), “Пахтакор” (Тошкент, 2020 йил) ва “Қўқон-1912” (Қўқон, 2021 йил) жамоаларида ўйнаган.

Асад Собиржонов шу кунгача Суперлига баҳсларида 56 та ўйинда майдонга тушиб, 3 та гол урган ҳамда 5 та голга ассистентлик қилган. Шунингдек, 21 ёшли ярим ҳимоячи Ўзбекистон кубоги доирасидан ўрин олган 3 та, Осиё Чемпионлар Лигаси (ОЧЛ)даги 2 та ўйинларда майдонга тушган. Бундан ташқари, ёш футболчи Ўзбекистон – U-21, Ўзбекистон – U-23 терма жамоаларида ҳам тўп тепган.