Расман. Роберто Фирмино Қатар чемпионатида ўйнайди

Бразилиялик ҳужумчи Роберто Фирмино фаолиятини Қатарда давом эттиради. 

33 ёшли форвард 2027 йилгача мўлжалланган шартнома асосида "Ал-Садд" клуби сафига ўтди.

Аввалроқ у Саудия Арабистонидаги "Ал-Ахли" клубида тўп сурган ва жамоа билан Осиё Чемпионлар лигасини қўлга киритган эди. Ушбу жамоа сафида ўтган мавсум барча мусобақаларда жами 31 учрашувда майдонга тушиб, 12 та гол ва 10 та голли узатма билан қатнашган.

У Саудияга сафар қилмасдан аввал эса Англиянинг "Ливерпуль" жамоасида ҳаракат қилиб, умумий 362 та беллашувда майдонга тушган ҳолда, 111 та гол урган ва 76 та голли узатмани ўз ҳисобига ёздириб қўйган.