Равшан Эрматов Россия терма жамоасининг иштироки CAFA турнирига нима бериши ҳақида гапирди

Хабарингиз бор, 9-21 июнь кунлари Бишкек ва Тошкент шаҳарларида футбол бўйича Марказий Осиё футбол ассоциацияси (CAFA) чемпионати ўтказилади. Ушбу мусобақа олдидан CAFA ижроия қўмитаси аъзоси, Ўзбекистон футбол ассоциацияси биринчи вице-президенти Равшан Эрматов Россиянинг ТАСС ахборот агентлигига интервью берди. Унда Эрматов Ўзбекистон футбол ассоциацияси мусобақани ташкил этишда энг юқори стандартларни қўллашни кафолатлашини таъкидлади.

- Футбол бўйича Россия терма жамоаси нафақат Европада, балки жаҳонда ҳам етакчилардан бўлиб, унинг Марказий Осиё футбол ассоциацияси (CAFA) чемпионатидаги иштироки турнирга қизиқишни оширади. Биринчидан, шуни айтмоқчиманки, CAFA терма жамоалар ўртасида биринчи чемпионатни ўтказишдан жуда манфаатдор. Иккинчидан, тарихга назар ташлайдиган бўлсак, Россиянинг номдор клублари “Спартак”, “Зенит”, “Динамо”нинг Марказий Осиёдаги “Пахтакор”, “Помир” ва бошқа жамоалар билан ўйинлари доим катта қизиқишга сабаб бўлганини эслаймиз. Ўшанда мухлислар трибуналарни тўлдирарди, аншлаг кузатиларди.

CAFA чемпионати бошқа турнирларга тайёргарлик кўриш нуқтаи назаридан ҳам мухлислар, ҳам жамоалар учун жуда қизиқарли бўлади. Ўзбекистон футбол ассоциацияси томонидан биз турнир, машғулотлар, футбол майдонларини ташкил этишда энг юқори стандартларни таъминлашга кафолат берамиз.

Aлбатта, агар Россия иштирок этса, ҳам мухлислар, ҳам бошқа жамоалар ўртасида ҳам турнирга бўлган қизиқиш ортади. Чунки Россия нафақат Европа, балки дунёнинг етакчи терма жамоаларидан бири, - деди Равшан Эрматов.

CAFA чемпионатида Ўзбекистон, Тожикистон, Эрон, Қирғиз Республикаси, Туркманистон, Россия ва Aфғонистон терма жамоалари иштирок этади. Мусобақага Осиёнинг яна бир терма жамоасини таклиф этиш ҳам режалаштирилган.