Равшан Ҳайдаров: "Бу илк ғалабамиз ва қўлга киритилган уч очко биз учун муҳим"

Бишкекда бошланган U23 Осиё Кубоги саралаш босқичининг илк беллашувида Ўзбекистон терма жамоамиз Шри-Ланкага қарши баҳс олиб борган ҳолда 4:0 ҳисобида рақибини тор-мор келтирди.

ЎФА матбуот хизмати ўйиндан кейин терма жамоамиз бош мураббийи Равшан Ҳайдаровнинг учрашув ҳақидаги фикрларини тақдим этди.

"Бутун ўйин давомида устунликка эга бўлдик, тўпни назорат қилдик. Албатта, Шри-Ланка жамоаси ҳам яхши ҳимояланди, аммо биз тўртта гол уришга муваффақ бўлдик. Муҳими — бу илк ғалабамиз ва қўлга киритилган уч очко биз учун жуда муҳим.

Умуман олганда, яхши ўйнадик. Ҳужумда фаоллик кўрсатдик, кўплаб вазиятлар яратдик. Аммо уларнинг барчасини голга айлантира олмадик. Шри-Ланка жамоасининг ҳимоясини ҳам эътироф этиш керак — улар жуда яхши ҳимояланишди".