Эшитган бўлсангиз, энди Бекободнинг “Металлург” футболи клуби қошида “Реал” Мадрид академияси фаолиятини бошлайди. Айнан дунёдаги топ-клублардан бири – “Реал” академияси Ўзбекистонда биринчи бўлиб “Металлург” билан ҳамкорликни йўлга қўймоқда.

Шуни айтиш керакки, ушбу лойиҳани амалга ошишида “El Golazo” компаниясининг хизмати катта бўлди. Чунки иккала томоннинг келишувга эришиши ва ҳамкорликни йўлга қўйишида бош-қош бўлиб келмоқда.

“El Golazo” компанияси “Real Madrid Foundation” билан ҳамкорликда Бекобод шаҳида “Металлург” футбол клуби академияси базасида “El Golazo Academy Powered by Real Madrid Foundation” номли футбол академиясини ташкил этганлиги эълон қилинди.

Шу сабабдан, “El Golazo” компаниясининг асосчиси Зокиржон Холиқовдан “Реал” ҳамда “Металлург” клублари академиялари ўртасидаги келишув қандай амалга ошганлиги, бундан кўзланган мақсад ва яна бошқа мавзуга доир қизиқарли масалалар юзасидан суҳбатлашдик.

- Хабарингиз бўлса, олдин ҳам айтгандим, бу ғоямиз 2019 йилдан бошланган, - дея гап бошлади “El Golazo” компанияси раҳбари Зокиржон Холиқов. - “Реал” билан академия ва ёш футболчиларни тайёрлаш лойиҳаси устида иш бошлагандик. 2020 йил бошларида шу масала бўйича Мадридга икки марта бориб келгандик. Афсуски, кейинчалик covid сабабли қолдирилганди. Асосий ташаббусни “Металлург” томонидан бўлишига сабаб, шу йилнинг январь ойида клубнинг бош ҳомийси Ўзбекистон металлургия комбинати раҳбариятида ўзгариш бўлди. Улар асосий эътиборни академияга қаратиш эканлигини билган ҳолда жорий йилнинг баҳор фаслидан музокараларни бошладик. Шу жумладан “Реал” Мадрид билан ҳам музокараларни ўтказдик. “Реал”нинг қўйган талабига кўра, улар нимага “Металлург” билан тўғридан-тўғри шартнома имзоламади? Сабаби шуки, эртага кимдир ФИФАга “Реал” вояга етмаган болаларни Ўзбекистонда тарбиялаяпти, профессионал клуб билан, деган маънода ёзиб юбориши мумкин. Шу сабабли, ушбу ҳамкорликни “El Golazo” орқали амалга оширишга келишдик. Шартнома бизнинг компаниямиз билан тузилган. “Металлург” билан эса алоҳида шартнома имзолаганмиз, академиянинг менежмент бошқарувини олиб бориш учун.

реал1

- Демак, “Реал” билан “Металлург” ўртасида “El Golazo” кўприк вазифасини бажаряпти. Бундан кўзланган асосий мақсад қандай? Масалан, “Реал” ҳамда “Металлург” томонидан қандай шартлар қўйилган?

- Худди шундай “El Golazo” компаниямиз ўртада кўприк вазифасини бажаряпти. Бу лойиҳадан асосий мақсад 11 дан 18 ёшгача бўлган болаларни “Реал” академиясининг машғулотлар услуби асосида профессионал футболчиларни вояга етказиш. Бундан ташқари, базада хусусий мактаб ҳам очилади. Унда инглиз ҳамда испан тиллари чуқур ўргатилади. Ўзбекистон таълим стандартларига асосланган фанлар ҳам ўргатилади. Футболчилар нафақат профессионал сифатида, балки четга легионер бўлиб ўйнаш учун тилларни яхши билган ҳолда чиқиб кета оладилар. Асосий мақсадлардан яна бири тарбияланувчиларни Европа клубларига сотиш. “Реал”дан алоҳида мутахассислар ҳам келади. Бу вазиятда биз “El Golazo” компанияси лойиҳа менежери сифатида фаолият олиб борамиз. Лойиҳамиз бўйича ҳар йили 50 нафар истеъдодли болаларни Мадридга юбориш кўзда тутилган. 16-18 ёшли болаларни кўпроқ юборишга ҳаракат қиламиз. Боиси, “Реал”га борганларида уларни бошқа клубларга ҳам кўрсатиш режаси бор. Имкон қадар академиядан етишиб чиқадиган футболчиларни Европа клубларига экспорт қилиш ва шу орқали ўзбек футболини кўтариш ҳамда терма жамоаларга асосий база бўлиб хизмат қилишини хоҳлаймиз. Айниқса, турли ёш тоифалардаги терма жамоаларимизда ушбу академиядан чиққан болалар ҳам тўп суришини истаймиз. Испанияда ўқиганлигим, “Реал” Мадрид курсларида қатнашганлигим, испан футболи тизимини, машғулотлар дарсини билганлигим сабабли испан футболи моделини ўзбек футболига олиб кириш мақсадларимдан бири эди. “Реал” орқали испан футболи моделини ўзимизга татбиқ этишга ҳаракат қиламиз. Футболчилар ҳуқуқий томондан расмий ўйинларда фақат “Металлург” клубининг номидан иштирок этади. Ўйинчиларнинг трансфер ҳуқуқи “Реал”га ҳам, “El Golazo”га ҳам тегишли бўлмайди. Трансфер ҳуқуқи фақат “Металлург” футбол клубига тегишли ҳисобланади. Биз академияда машғулотлар жараёнини тўлиқ назорат қиламиз.

реал3

- Академия қачондан ўз ишини бошлайди? Ўқув жараёни бошланганда неча нафар бола қабул қилинади? Мураббийлар бошланишига ўзимиздан жалб қилинадими ёки “Реал” ўз мутахассисларини ҳам юборадими?

- “Металлург” базасида катта қурилиш ишлари олиб борилмоқда. Бу ишлар август ойи ўрталарига тугатилиши мўлжалланган. Келаси ҳафтада “Реал” Мадрид томонидан икки нафар мутахассис келади. Техник директор ва унинг ёрдамчиси. Улар “Реал” системасида ишлаган инсонлар. Биринчи навбатда, “Металлург” клубида фаолият олиб бораётган маҳаллий мураббийларни кўрикдан ўтказадилар. Параллел равишда селекция ишларини ҳам олиб борадилар. Гранд асосида қабул қилинадиган 84 нафар болани - Ўзбекистон доирасида 11-16 ёшгача бўлган футболчиларни ўзлари танлаб оладилар. Академия сентябрь ойи бошида ишга тушади. Бундан ташқари, “Реал”нинг ўзида ҳам асосий академияда фаолият олиб борадиган техник директор бириктирилган. У ҳар уч ойда келиб, машғулотлар жараёнини бир ҳафта давомида кузатиб, кўрсатмаларини беради. “Реал” тарафидан юбориладиган иккита мутахассис эса доимий равишда Бекободдаги академияда фаолият олиб борадилар. Шунингдек, ойда икки марта Мадридга машғулотлар жараёнидан видеотасвирларни юборамиз. Бу худди ҳисобот тариқасида бўлади. Бу ерга келадиган техник директор билан улар доимий равишда алоқада бўлиб турадилар.

- Бундай келишув биз учун муҳим воқелик. Лекин бу таклиф “Реал” томонидан қандай қабул қилинди? Уларнинг ўзбек клубларига қизиқиши қай даражада бўлди?

- Тўғрисини айтганда, музокаралар анча чўзилди. Чунки “Реал”ни кўндириш қийин бўлди. Мадрид клубининг бундан ютадигани шуки, улар имкон қадар дунё бозорини эгаллашга ҳаракат қиляпти, “Реал” имижини янада юксалтириш учун. Хабарингиз бўлса, “Реал” инстаграмдаги саҳифасида 100 миллион обуначисига эга бўлган дунёдаги биринчи клубга айланди. Маркетинг ва имидж тарафидан бу “Реал” учун жуда муҳим. Бундан ташқари, ўзининг қадриятларини, тажрибасини Ўзбекистонда ёйиш ва клуб брендини юртимизда янада ошириш ҳам кўзда тутилган. Бу лойиҳа орқали “Реал”нинг имиджига путур етказмаслик учун ва ўйлаган режалар ўз вақтида аниқ, самарали йўлга қўйилиши мақсадида ҳам “Реал”дан мутахассислар келади. Улар клубнинг имиджига путур етиб қолишидан хавфсирашади. Шу боис мадридликлар ҳам бу ердаги академия ишини тўлиқ назорат қилиб, уни юксалтиришга бор кучларини берадилар. Яна шуни қўшимча қилмоқчиман, “Реал” Мадрид билан шартнома уч йилга тузилган. Агар ҳаммаси яхши кетса, улар шартномани чўздиришга рози бўлади. Биз ҳам бу вақт давомида “El Golazo” тарафидан ишнинг аниқ ва мукаммал бажарилишига ҳаракат қиламиз.

реал4

- “Реал” Мадрид шу йўл орқали ўзбек футболига кириб келмоқда. Клубнинг “Металлург” билан ҳамкорлиги бўйича масалан, Флорентино Перес ёки бош мураббий Карло Анчелотти хабардорми? Бундан ташқари, “Реал”да тўп сурган собиқ футболчиларнинг “Металлург” академиясида болаларга мастер-класс ўтказиш режаси ҳам борми?

- “Реал”нинг болалар футболидаги халқаро лойиҳалари “Real Madrid Foundation” орқали олиб борилади. Унинг директори эса Флорентино Пересга яқин одамлардан. Карло Анчелоттининг балки бундан хабари йўқдир. Лекин Флорентино Перес клуб президенти сифатида албатта бундан хабардор бўлади. Очилиш маросимига мастер-класс ўтказиш учун “Реал” афсоналарининг Ўзбекистонга келиши назарда тутилган. Шунингдек, ҳар йили 50 нафар иқтидорли болаларни “Реал” академиясига юборганимизда Роберто Карлос, Арбелоа, Рауль, Икер Касильяс албатта уларга мастер-класс ўтаб беради.

- “Реал”нинг “Металлург”дан ташқари яна бошқа ўзбек клублари билан ҳам ҳамкорлик қилиш режаси борми?

- “Реал”нинг нафақат Ўзбекистонда, балки Марказий Осиёдаги ягона ҳамкори ҳисобланамиз. Ҳозирча “Металлург”дан ташқари бошқа клубларга қизиқиш билдирилгани йўқ. Лекин биз келажакда нафақат испан футбол моделини “Металлург” академияси орқали жорий қилиш, балки яна бошқа испан клублари академияси филиалларини Ўзбекистонда очиш ниятимиз бор. Чунки “El Golazo” “Реал”дан ташқари, “Барселона”, “Атлетико” ва яна бошқа клублар билан ҳам ҳамкорлик қилади.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию