“Реал” “Барса” кутаётган ўйинчини олиб қўймоқчи

Испаниянинг амалдаги чемпиони “Барселона” қишки трансфер ойнаси даврида “Леванте” ҳужумчиси Карл Эйонгни олиш орқали жамоа ҳужум чизиғини кучайтиришни режалаштирмоқда.

- Футболчининг ўзи январь ойида Каталония клуби билан ҳамкорлик шартномасини тузишга тайёрлигини, бироқ мавсумни ижара асосида “Леванте”да якунлаб қўйиш имкони берилишини сўраяпти, - деб ёзди Mundo Deportivo  нашри.

Бироқ, Marca нашри журналисти Рожер Тореллога таяниб хабар беришича, 22 ёшли футболчига нафақат “Барселона”, балки  “Реал”, “Манчестер Сити”, “Манчестер Юнайтед” ва “Арсенал” ҳам жиддий қизиқиш билдирмоқда.

“Барселона” Эйонгни 37 ёшли Роберт Левандовскига ўринбосар сифатида олиб келмоқчи. Камерунлик ҳужумчининг амалдаги шартномасида Ла Лига клублари учун 30 миллион, Англия Премьер-лигаси вакиллари учун эса 40 миллион миқдорида бадал пули кўрсатилган банд борлиги айтилмоқда.

Жорий мавсумда Эйонг Испания чемпионатидаги дастлабки 10 та ўйинда 6 та гол урди ва 3 та голли узатма берди.  Унинг шартномаси 2029 йил ёзигача амал қилади. Transfermarkt портали уни 20 миллион еврога баҳолаган.