"Реал" дарвозабони билан шартномани узайтиришга яқин

Мадриднинг "Реал" клуби дарвозабони Тибо Куртуа билан шартномани узайтиришга яқин турибди. Бу ҳақда инсайдер Никола Скира ижтимоий тармоқ Х (аввалги Twitter) орқали хабар берди.

Манбанинг ёзишича, белгиялик посбон ва клуб 2027 йилгача мўлжалланган янги келишув бўйича музокараларни якунлаш арафасида. Айни дамдаги шартнома 2026 йил 30 июньга қадар амал қилади.

Ушбу мавсумда Куртуа "Реал" сафида барча мусобақаларда 44 ўйинда майдонга тушиб, 50 та гол ўтказиб юборган ва 14 учрашувда дарвозасини дахлсиз сақлаган. Transfermarkt порталига кўра, 33 ёшли футболчининг бозор баҳоси 25 миллион еврони ташкил қилади.

34 ўйиндан сўнг "Реал" Ла Лига турнир жадвалида 75 очко билан иккинчи ўринда бормоқда. 35-турда Карло Анчелотти жамоаси "Барселона"га қарши майдонга тушади.