“Реал” футболчилари қайси мураббий жамоага келишини исташади?

"Реал" кийиниш хонасида жамоанинг янги бош мураббийи сифатида Жозе Моуриньони эмас, балки Юрген Клоппни кўришни афзал кўришади. Бу ҳақда Cadena SER журналисти Гонсало Алварес маълум қилди.

Манба маълумотларига кўра, Мадрид клуби футболчилари Моуриньонинг иш услуби жамоа ичида кескин муҳитга олиб келиши мумкин, деб ҳисобламоқда. Қайд этилишича, португалиялик мутахассис ўзининг қаттиқроқ ва зиддиятли ёндашуви билан танилган, Клопп эса футболчиларда кўпроқ меҳр уйғотади.

Шунингдек, Алварес клуб президенти Флорентино Перес Клопп номзодининг жозибадорлигини тушунишини, бироқ Моуриньонинг қайтиши бериши мумкин бўлган оммавий ахборот воситалари таъсирини ҳам англаб етганини таъкидлади.

Аввалроқ Sky Sports мадридликлар "Бенфика"нинг амалдаги мураббийи Моуриньони таклиф қилиш вариантини кўриб чиқаётгани ҳақида хабар берган эди, бироқ томонлар ўртасида ҳали расмий музокаралар ўтказилмаган.