“Реал” катта йўқотишга дуч келганини эълон қилди

Мадриднинг “Реал” клуби мавсумнинг қизғин палласида катта йўқотишга дуч келди. Клуб расмий сайти орқали “Хетафе” билан ўйинда шикастланганига қарамай, ўйинни давом эттирган Родриго Гоэснинг жароҳати жиддий бўлиб чиққанини эълон қилди.

Бразилиялик футболчи ўнг оёқ тиззасидан шикастланган эди. Текширувлардан кейин маълум бўлишича, унинг хочсимон боғламлари узилиб кетган.

- Ўтказилган тиббий текширувлар натижасига кўра, футболчимиз Родригода ўнг оёқ олд хочсимон боғлами ва ташқи пайлари узилиши аниқланди, - дейилади “Қироллик клуби” баёнотида.

Аввалроқ, Marca нашри 25 ёшли вингер мавсум қолган қисмини ва 2026 йилги жаҳон чемпионатини ўтказиб юборишини хабар қилган эди.

Бразилиялик футболчи Испания чемпионатининг 26-турида “Хетафе”га (0:1) қарши ўйинда жароҳат олган. У жароҳатга қарамай баҳсни давом эттирган ва 55-дақиқада майдонга тушиб, ўйинни охиригача ўйнаган.