"Real Madrid" yarim himoyachisi jamoani tark etishi mumkin

28 yoshli yarim himoyachi Dani Sebalos "Real Madrid"ni tark etish imkoniyatini ko‘rib chiqmoqda. Bu haqda "AS" nashri xabar berdi. Ammo futbolchi klubda qolish imkoniyatini ham istisno qilmayapti.

Sebalosga "Betis" klubi qiziqish bildirmoqda. Biroq, sevilyaliklar safida uni olish-olmaslik masalasida fikrlar ikkiga bo‘lingan. Sababi — Dani 2023 yilda ularning taklifini rad etgan.

Bitimdagi asosiy to‘siq — moliyaviy masala. "Betis" futbolchini 5–10 million evro atrofida baholamoqda. Ammo "Real" kamida 20 million evro olmoqchi. Shuningdek, Sebalosning maoshi ham muammo tug‘dirmoqda: u soliqlardan so‘ng yiliga 4 million evrodan ziyod oladi, soliqlar bilan esa bu summa 9 million evroni tashkil etadi — bu La Liganing ko‘plab klublari uchun og‘ir yuk.

Ijara varianti ham muhokama qilinmoqda, agar maoshning bir qismi "Real" tomonidan to‘lanadigan bo‘lsa. Ammo bu variantni hech qaysi tomon ideal deb hisoblamaydi.

Hozircha "Real" Sebalos bo‘yicha rasmiy taklif olmagan, ammo "Betis"dan so‘rovlar tushgan.