“Реал” майдон марказини “Бавария” юлдузига топширмоқчи

“Реал” ўтган ёзда профессионал фаолиятини тугатган Тони Кроос ўрнига бошқа таянч ярим ҳимоячи оладиган бўлди.

Франциялик Орельен Тчуамени немис футболчиси ўрнини боса олмади. Энди мадридликлар бу позицияда “Бавария” ва Германия терма жамоаси юлдузи Йозуа Киммихни олиб келмоқчи. Бу ҳақда асосан немис футболини ёритишга ихтисослашган журналист Флориан Плеттенберг хабар берди.

Манбага кўра, “Қироллик клуби” Киммих атрофидаги вазиятни кузатиб бормоқда ва имкон туғилиши билан унга ҳамкорлик шартномасини беради.

29 ёшли ярим ҳимоячининг мюнхенликлар билан шартномаси мавсум охирида якунига етади. Бошқа клублар 1 январдан у билан музокара бошлаши мумкин. “Бавария” Йозуани ҳали жамоада қолишга кўндира олгани йўқ.